Sinulat ni Elvira Bongosia
Gimando sa Department of the Interior and Local Government (DILG) ngadto sa Philippine National Police (PNP) ang hingpit nga pagpatuman sa pagsuot ug face shields tungod sa ubos nga paggamit sa publiko.
Giingong sumala pa sa mga ekspierto sa medisina, ang hiniusa nga kaepektibo sa populasyon susama sa face masks ug face shields naa lamang sa 26% imbes nga 80% kun gamiton kanunay.
“According to the medical experts, the combined population effectiveness of both the face masks and face shields is only at 26% instead of 80% if use was more prevalent,” matud pa sa pahayag ni DILG spokesperson Undersecretary Jonathan Malaya.
Tungod niini, kinahanglang dugangan ang pagpagamit sa face shields aron makab-ot ang ‘maximum protection’ ning panahon nga nagkasaka ang gidaghanon sa nataptan sa Coronavirus disease (Covid).
Base sa datos sa National Task Force Against COVID-19 (NTF), 32 porsyento lamang ang nagsuot ug face shield samtang 91 porsyento ang sa face mask.
Gi-awhag usab ni Malaya ang publiko nga dili una modawat ug bisita tungod sa lisod nga pagpatuman sa pagpasuot ug face mask sulod sa balay.
Gikan Agosto 20 hangtod Marso, natala ang 1,503,273 ang milapas sa health protocols.
Niining numero, 671,104 o 44.6% ang wala nagsuot ug face mask ug face shield samtang 430,773 o 28.7% ang nagsuot ug face mask apan wala nagsuot ug face shield.