ni Padre Jose “Joesum” Sumampong, Jr.
Abril 11, 2021
Ika-Duhang Domingo sa Pagkabanhaw (B)
EBANGHELYO (Juan 20: 19-31)
Sa pagkagabii na niadtong Domingoha, nagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio. Unya mitungha si Jesus sa taliwala nila ug miingon, “Mainyo unta ang kalinaw.”
Human siya makasulti niini, iyang gipakita kanila ang iyang mga kamot ug ang iyang kilid. Nalipay pag-ayo ang mga tinun-an sa ilang pagkakita sa Ginoo. Unya si Jesus miingon kanila pag-usab, “Mainyo unta ang kalinaw. Ingon nga gipadala ako sa Amahan, ako usab nagpadala kaninyo.” Gisulti niya kini ug unya gihuypan niya sila ug giingnan, “Dawata ninyo ang Espiritu Santo. Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon.”
Si Tomas (nga ginganlag Kaluha), usa sa napulog duha ka tinun-an, wala mahiuban kanila sa pag-anha ni Jesus. Busa gisuginlan siya sa ubang mga tinun-an, “Nakita namo ang Ginoo!”
Si Tomas miingon kanila, “Gawas kon makita ko ug ikatapion ang akong tudlo sa inagian sa mga lansang diha sa iyang kamot, ug mahikap ko ang samad sa iyang kilid, dili ako motuo.”
Human molabay ang usa ka semana, nagtigom na usab ang mga tinun-an sulod sa lawak, ug nahiuban na kanila si Tomas. Gitrangkahan ang mga pultahan, apan mitungha si Jesus ug mibarog sa taliwala nila ug miingon, “Mainyo unta ang kalinaw.” Unya miingon siya kang Tomas, “Tan-awa ang akong kamot ug hikapa kini; hikapa usab ang samad sa akong kilid. Tuo ug ayaw na pagduhaduha!”
Si Tomas miingon kaniya, “Ginoo ko ug Dios ko!” Unya miingon si Jesus kaniya, “Mituo ka ba tungod kay nakakita ka kanako? Bulahan kadtong motuo bisan wala makakita kanako!”
Ug daghan pang mga milagro nga gibuhat ni Jesus sinaksihan sa iyang mga tinun-an nga wala mahisulat niining basahona. Apan gisulat kini aron kamo motuo nga si Jesus mao ang Mesiyas, ang Anak sa Dios, ug pinaagi sa maong pagtuo makabaton kamo og kinabuhi diha sa iyang ngalan. Ang Ebanghelyo sa Ginoo.
oOo
KAHULOGAN SA EBANGHELY0 (Jn 5:1-6 / Jn 20:19-31)
19 Sa pagkagabii na niadtong Domingoha, nagtigom ang mga tinun-an… 26 Human molabay ang usa ka semana, nagtigom na usab ang mga tinun-an sulod sa lawak,
Naghisgot ang Ebanghelyo karon sa duha ka higayon nga ang nabanhaw nga Jesus nagpakita. Kasagaran atong tagaan og mas dakong pagtagad ang ika-duhang pagpakita—kadtong nahiapil na si Tomas. Kana tungod kay kasagaran man usab nato pupareho man sa kasinatian ni Tomas diha sa atong usahay “pagka-kulang sa pagtuo”. Apan bisan pa niana, dili gayod nato kalimtan ang kinatibuk-an sa maong saysay.
Una sa tanan, atong namatud-an nga si Jesus nagpakita sa unang adlaw sa semana, adlawng Domingo. Maoy hi-nungdan nga kita nga mga Kristiyanos magtagbo isip katilingban sa adlaw nga Domingo. Ug tungod kay nagkatapok man ang mga tinun-an sa pagpakita ni Jesus, mao usab nga ang atong pagtuo dili gayod isipon nga usa lamang ka kinaugalingon o personal nga kalihokan, kondili usa ka katilingbanon nga kalihokan. Ang mga tinun-an nagkahiusa diha sa ilang panagtigom sama sa panagtigom kanato sulod sa atong simbahan diha sa pagsimba o kaha diha sa GSK cluster faith sharing o meeting.
19b … ug gitrangkahan nila ang pultahan kay nahadlok man sila sa mga kadagkoan sa mga Judio. Unya mitungha si Jesus sa taliwala nila…
Sa panahon nga gisulat kini ni Juan nagpadayon pa ang pagpanggukod batok sa mga Kristiyanos. Diha pa kanila ang kahadlok. Matag karon ug unya magbalhinbalhin sila sa panagtapok sa panimalay tungod sa kahadlok nga adunay motudlo o moluib kanila ngadto sa ilang mga kaaway. Apan ang ilang panagtapok panahon sa Domingo maoy nakahatag nila og dakong kaisog, daw kabag-ohan sa Pagkabanhaw ni Jesus.
Oo, ang matag Domingo mao ang adlaw sa pagbag-o sa Pagkabanhaw! Si Jesus nakig-uban kanato aron sa pag-hatag sa Iyang Kinabuhi. Bisan pa kon dili nato Siya makita, apan kita mituo!
May mga higayon nga buot usab kita nga motrangka sa atong mga pultahan bisan sa atong panahon karon tungod sa kahadlok. Diha sa paghuyop sa Espiritu, agad pa unta nga ang mga pultahan mabuksan ug ang mga malipayong awit atong pagalaylayon tungod kay nakig-uban kanato si Jesus nga nabanhaw!
Mangutana kita kon unsa kahay mga siradong pultahan sa atong tagsatagsa ka kinabuhi nga ang Dios naghagit sa matag usa kanato nga atong pagabuksan? Unsa kahay mga bahin sa atong kinabuhi nga wala pa kaablihi alang sa Ginoo?
19c ug miingon, “Mainyo unta ang kalinaw.” 20 Human siya makasulti niini, iyang gipakita kanila ang iyang mga kamot ug ang iyang kilid. Nalipay pag-ayo ang mga tinun-an sa ilang pagkakita sa Ginoo. 21 Unya si Jesus miingon kanila pag-usab, “Mainyo unta ang kalinaw.
Ang kalipay sa Pasko sa Pagkabanhaw dili dali nga atong pagabation. Dili kini sama sa kalipay tungod kay ang mga panghitabo nagdalag kaayohan: kon kita anaa sa kaharohay, kasayon, kaayog lawas, o malampuson sa atong tinguha. Ang kalipay sa Pasko sa Pagkabanhaw masinati lamang human sa kahadlok. Ang kalinaw nga gihatag ni Kristo mao ang kalinaw human sa kagubot ug kaguliyang.
Mao nga sulod sa Santos nga Misa, anaa ang pagpakita sa timaan sa kalinaw tungod kay kitang tanan naghambin man sa atong kaugalingong mga kasakit ug suliran.
21b Ingon nga gipadala ako sa Amahan, ako usab nagpadala kaninyo.”
Kitang tanan diay mga pinadala ni Kristo. Aduna kitay mensahe gikan kang Kristo nga kinahanglan atong ipaambit sa uban.
Gikalipay ko ba ang pagpaambit sa akong kasinatian sa pagtuo panahon sa mga tigum sa GSK cluster?
22 Gisulti niya kini ug unya gihuypan niya sila ug giingnan, “Dawata ninyo ang Espiritu Santo…
Ang gasa sa Espiritu Santo, usa ka gasa alang sa kabag-ohan.
24 Si Tomas (nga ginganlag Kaluha), usa sa napulog duha ka tinun-an, wala mahiuban kanila sa pag-anha ni Jesus…
Dakong sayop diay kon kita dili mahiuban o magdugaydugay sa pag-abot o latecomers.
26 Human molabay ang usa ka semana, nagtigom na usab ang mga tinun-an sulod sa lawak, ug nahiuban na kanila si Tomas… si Jesus miingon, “Mainyo unta ang kalinaw… Tuo ug ayaw na pagduhaduha!”
Si Jesus mihatag og kahigayonan nga si Tomas makabaton og pagtuo. Mihatag gayod siya sa tanan sa maong kahigayonan—bisan pa niadtong atong mga silingan nga nagmakuli sa pag-apil sa atong mga tigum sa cluster. Inay nga ato silang kondenahon, ato hinoon silang hatagan og kahigayonan.
Kadtong wala karon sa atong cluster meeting, ato bang pagadapiton sa sunod nga mga higayon?
28 Si Tomas miingon kaniya, “Ginoo ko ug Dios ko!” 29 Unya miingon si Jesus kaniya, “Mituo ka ba tungod kay nakakita ka kanako? Bulahan kadtong motuo bisan wala makakita kanako!”
Usa ka pagpadayag sa Pagtuo sa usa ka tawo nga dili na kinahanglan nga mohikap. Kini mao ang tinuod nga Kalipay.
=====
PADAYONON NATO ANG PAG-AMPO ALANG SA ATONG HINIUSANG PAGMAYA UG
PAGPASALAMAT ATOL SA IKA-500 KA KASAULOGAN SA ATONG PAGDAWAT SA
PAGKA-KRISTYANO SA ATONG NASUD,
UG SA ATONG PAGPANGANDAM SA IKA-DUHANG SINODO SA TAGBILARAN, UG PAGBALHINAY SA ATONG KAPARIAN! NIINING PANAHON NGA SAULOGON NATO PANAHON SA PAGKABANHAW 2021.