Sinulat ni Dave Albarado
Adunay laraw ang kagamhanan sa Bohol nga mugahin ug P500 milyon alang sa mga proyekto kabahin sa End Local Communist Armed Conflict (ELCAC) aron mahimong magpabilin ang kahapsay ug kalinaw sa probinsya ug insurgency-free.
Kini ang nasabutan sa labing ulahing tigom sa Provincial Peace and Order Council nga nahitabo sa ulahing bahin sa Marso 2021, matud pa sa taho sa Philippine Information Agency (PIA).
Ang mga tinugyanan sa Bohol miila sa mga barangay sa lungsod sa Antequera, Clarin, Calape, Inabanga, Maribojoc ug Sagbayan.
Pito ka mga proyekto ang giplanuhan nga ipatuman sa lungsod sa Antequera diin P40 milyon ang plano nga ibubo sa maong lungsod.
Sa Calape, lima ka mga proyekto ang gilantaw nga gahinanan ug P20 milyon nga budge ug didto sa Clarin gahinan ug P 60 milyon nga budget alang sa ELCAC.
Didto sa Inabanga, ang maong lungsod gahinan ug kantidad ug P 324 mliyon nga budget alang sa mga proyekto nga ipahamtang sa siyam ka target barangays sa naasoy na lungsod.
Sa laing bahin, adunay 2 ka proyekto nga gilaraw didto sa lungsod sa Maribojoc nga adunay budget ug P60 milyon.
Ang lungsod sa Sagbayan usab kay makadawat ug mga proyekto nga nagkantidad ug P60 milyon.
Kabahin kon asa kuhaon ang pundo alang sa mga ELCAC projects, kuhaon kini gikan sa nasudnong kagamhanan pinaagi sa Department of the Interior and Local Government. Muhatag ug proposal ang mga tinugyanan sa Bohol aron maapil ang budget sa nasudnong budget sa tuig 2022.
Ang lain pang tinubdan sa pondo mao ang mga nasudnong mga ahensya sama sa Armed Forces of the Philippines, Philippine National Police, Department of Social Welfare and Development, Department of Education, Department of Public Works and Highways, National Irrigation Administration, Department of Energy, Department of Trade and Industry, Technical Education and Skills Development Authority, Department of Agriculture, Department of Environment and Natural Resources ug ang Department of Agrarian Reform.
Apil usab sa posibleng kuhaan ug pondo ang Office of the Civil Defense, National Youth Commission, Philippine Charity Sweepstakes Office, National Housing Authority, Department of Tourism, Philippine Coconut Authority, Philippine Crop Insurance Corporation, Bureau of Fisheries and Aquatic Resources ug ang Department of Budget and Management-Local Government Support Fund.