Sinulat ni Dave Albarado
Temporaryong gisuspenso sa Department of Health (DOH) ug sa Food and Drug Administration (FDA) ang pagpatupoksa bakuna batok sa Coronavirus disease (Covid) nga hinimo sa kompaniyang AstraZeneca alang sa mga katawhan nga adunay panuigon nga 60 anyos paubos.
Kini nunot sa mga asoy nga adunay pipila sa mga natupokan sa bakuna nga hinimo sa AstraZeneca sa ubang nasod ang nakasinati sa pagbugon sa dugo, ug pag-ubos sa ihap sa ilang platelet human nabakunahan.
Matod pa ni FDA director general Eric Domingo sa usa ka pamahayag nga sila nahibawo sa sugyot sa European Medicines Agency (EMA) nga iapil sa lista ang pagbugon sa dugo isip talagsaon nga dili maayong epekto san bakuna nga ginama sa AstraZeneca.
Nasayran nga ang AstraZeneca maoy bakuna nga giplanuhan nga paliton sa kasagaran sa mga lungsod, dakbayan ug lalawigan dinhi sa nasud apil na ang Bohol ug ang dakbayan sa Tagbilaran.
Matod ni Domingo nga bisan wala pay natalang kaso sa pagbugon sa dugo ug pag-ubos sa ihap sa platelet sa mga nabakunahan sa AstraZeneca sa Pilipinas, apan kinahanglang ihunong usa ang pagbakuna aron maseguro ang kaluwasan sa mga Pilipino.
Dugang pa ni Domingo nga bisan gisuspenso ang pagbakuna sa AstraZeneca, wala nagpasabot nga delikado ug dili epektibo ang maong bakuna.
Nanawagan ang mga timugyanan sa mga ahensya sa DOH ug FDA ngadto sa publiko, labi na sa mga hamtong ug panuigon ug adunay daan nga mga sakit, nga magpabakuna gihapon batok sa Covid gumikan kay luwas ug libre ang mga bakuna.