Sinulat ni Dave Albarado
Gipasabot ni Board Member Ricky Masamayor ang panginahanglan na gayud sa pagpamalit ug bag-ong sakyanan alang sa mga sakop sa Sangguniang Panlalawigan (SP) sa Bohol.
Kini ang gipadayag ni Masamayor atol sa pakighinabi kaniya nga gisibya sa usa ka binayran nga programa sa radyo sa kagamhanang probinsyal niadtong adlaw Miyerkules, Abril 7, 2021, sa dyTR.
Matod ni Masamayor nga ang ubang mga sakyanan sa mga board member nadaot na ug gikinahanglan nila ang maayong kondisyon sa sakyanan alang sa ilang trabaho ilabi na kon aduna silay mga biyahe sa mga kalungsoran nga adunay kalambingitan sa ilang trabaho isip sakop sa SP.
Dugang pa niya nga adunay mga board member ang wala nay magamit nga mga sakyanan.
Giklaro sab ni Masamayor nga ang paliton nga mga bag-ong sakyanan kay mga 4×4 pickup truck ug dili Sports Utility Vehicle sumala sa unang gi-pangayo sa mga sakop sa SP niadtong panahon sa paglingkod ni Senior Board Member Victor Balite isip Acting Vice Governor.
Dugang ni Masamayor nga gikinahanglan ang mga bag-ong alang sa kaluwasan ug seguridad sa biyahe sa mga sakop sa SP.