Sinulat ni Elvira Bongosia
Nipasidaan ang Department of Health (DOH) sa publiko nga delikado ang paggamit ug mga tambal nga dili rehistrado.
Kini ang gipagawas nga pahayag sa DOH taliwala sa pagmagahi ni Anakalusugan Party-list Rep. Mike Defensor sa plano niining mangapod-apod ug libreng ivermectin drug.
“Gusto natin bigyan ng babala ang ating mga kababayan ang mga unregistered drugs po ay hindi masisiguro ng ating gobyerno na ito ay ligtas at maproprotektahan sila dito sa sakit na sinasabi natin na paggagamitan nito,” matud pa ni Undersecretary Maria Rosario Vergeire.
(Among hatagan ug pasidaan ang atong kaigsuonang Pilipino nga ang mga tambal nga wala marehistro, dili maseguronsa kagamhanan nga luwas kini o mapamalipdan sa sakit diin ang tambal gamiton.)
Kahinumdoman nga nipagawas ug pahayad si Defensor nga nagtuo siyang luwas ug posibleng epektibo batok sa Coronavirus disease (Covid) ang ivermectin tungod kay siya mismo giingong nigamit niini niadtong naigo siya sa coronavirus.
Apan matud pa sa World Health Organization (WHO) ug European Medicines Agency, wala pa’y igong ebidensya aron makaingon nga epektibo batok sa Covid ang nahisgotang tambal.
“We recommend not to use ivermectin in patients with COVID-19 except in the context of a clinical trial,” matud pa sa gipagawas nga pahayag sa WHO.
(Dili namo gi-recommendar ang paggamit sa ivermectin isip tambal batok sa Covid, hinoon dili apil ang paggamit sa maong tambal alang sa clinical trial.)
Samtang matud pa ni Vergeire, kuyaw ang “false sense of security” nga posibleng kuptan sa mga Pilipino sa paggamit sa ivermectin.
Giingong gi-imbestigahan na sa Food and Drug Administration (FDA) ang posibleng silot kang Defensor.
Matud pa nga may bag-ong review na usab ang gihimo ang panel sa mga local experts human nagpulong ang mga ahensya ug proponent sa ivermectin niadtong milabay nga semana.
Ang ivermectin usa ka orihinal nga tambal isip pampurga sa mga binuhing hayop.
Una na usab nga niingon ang FDA nga panghaplas sa panit ang rehistradong gamit sa ivermectin dinhi sa Pilipinas nga alang sa tawo.
Ang mga rehistradong ivermectin nga tableta o tambal alang lamang sa mga mananap.