ni: Jes B. Tirol
Kiling 18, 2021
Mga Tigmò
Pasiuna
Ang pagbuhat ug pagtubag sa tigmò dugay na kini nga gibuhat sa tawo sa tibuok kalibutan. Sa Balaang Kasulatan atong mabasa sa Anib (chapter) 14 sa Basahon sa Mga Maghuhukom (Book of Judges) ang tigmò ni Samson nga nagkanayón, “Gikan sa manunukob migula ang makaon; gikan sa kusgan migula ang matam-is”.
Dinhi sa Kabisay-an ang pagbuhat ug pagtubag sa mga tigmo, kinaham kaayo nga tulumanon sa radyo.
Si Tangba (Reverend) Fernando Buyser adunay diyotay nga basahon nga gilangkoban og 606 ka mga tigmò. Napatik kini sa tuig 1925. Atong tukibon ang pipila ka mga tigmo ug ang ilang mga tubag
Mga Tigmò ug Tubag
1. Natawong walay inahan, naminyong walay ugangan, — Si Adan ug si Ebà
2. Ang igsuong babaye sa imong iyaan nga dili mo iyaan, ig-únsa man nimo — Inahan
3. Matá sa iring dili masil-ing.— Adlaw
4. Baston ni San Jose ihapon dili maisip. — Ulan
5. Kun tan-awon daw bató, walay ulo, mata ra. — Alimango o Kagang
6. Usa ka dupa nga bagon dili abutón daganon. — Anino sa tawo
7. Limatok sa tindahan dili mopáak kun dili dalúnggan. — Ariyos
8. Malingin dili man kahil, maputi dili man papel, halang dili luy-a, mahumot dili agua.— Ahos
9. Kon putlan, magakataas. — Agi sa gabás
10. Kon kuhaan, magakadako. — Atabay
11. Sa layô, maayong tan-awon, dili makita kun imong duolon. — Amimihig o agukoy
12. Balay nga gamay, napunÔ sa mga tigib. — Bâbâ ug mga ngipon
13. Ang nakakitâ walâ makapunit, ang nakapunit walâ makakaón, ang nakakaón walâ mabusog. — Mga mata, kamot, ug bâbâ
14. Gigapos ug gihiktan apan maoy hari sa pagalaktan. — Bansalan (Helm)
15. Kon maadlaw Iho, kon magabii pagi — Banig. Lukoton sa adlawan ibuklad sa gabii
16. Kahoy sa Manila, putlon dili maláyà. — Buhok
17. Kabaw sa lawod, managgukod. — Balod
18. Kamoti sa Leyte atoa sa ilalom ang pánit. — Batikulon
19. Dakô gayod apan dili makítà. — Bathálà
20. Gibantog nga ako “labandera” apan sa sabon walâ ako makaila, ang pag-ingon ko nga “labandera” aron lamang sa pagpakatawa. — Bandera
21. Bukubuko sa buaya, ulan ug init iya. — Balibungan
22. May langgam gabukad, may mga pakô apan dili makalupád. — Balay
23. Sa gamay pa alibangbang, sa nadako na watí. — Bulak sa batong
24. Mga bato ang gamot, mga kahoy ang bunga, mga lindog lanot. — Baling (dragnet)
25. Kon mahapon mangambak, kon mabuntag manghúlop. — Banig
26. Ang amahan bayi, ang inahan bayi, ang anak bayi, tag-ana unsa kini? — Bayibayi (Shin) 27. Dalî hugási kay mosulod ako mokisikisi — Batirol ug buluniyo