Sinulat ni Rey Anthony H. Chiu
Sa padayon nga pagpaningkamot nga ma-agni ang mga Bol-anon nga mananum para sa pagkaon niining panahon sa pandemya kanus-a nagnihit ang kwarta para ipalit ug pagkaon, napun-an na usab ug duha ang Agricultural Learning Areas (ALA) sa Bohol.
Kini maoy gipaambit ni Agricultural Training Institute (ATI) Regional Director Dr. Carolyn May Daquio, atul sa opisyal nga pagbukas sa usa ka kan-anan didto sa Corella nga nagtanyag ug mga ohong sa ilang menu.
Didto sa pagbukas sa Alfresco Resto sa Green Thumb Farm sa Sambog Corella, gipadayag usab ni Daquio nga miabut na sa 45 and ilang mga natabangan nga mamahimong ALA dihang gidugang ang lain pa nga 2 ka kaumahan.
Aron mahimong ALA, kinahanglan nga ang kaumahan magtanyag sa kasinati-an nga makakat-on ang mosuroy, may makuha nga nindot nga kasinati-an, makapa gahum sa mga tawo nga mosuroy nagdto sa paghimog maayong lakang, makapasugod sa kapanarbaho-an alang sa mga silingan nga mga trabahante ug magkahatag ug kalingawan.
Gipasabut ni Daquio nga ang mga kaumahan nga ila na nga na certify nga learning areas, maningkamot usab nga makaabut sa matang sa pagka learning school sa Technical Education and Skills Development Authority (TESDA) alang sa organic farming, hog raising ug uban pa nga kamauhan nga adunay kalambingitan sa agrikultura.
Human makasugod isip tunghaan o kat-onanan alang sa mga mingkuha sa mga kurso sa TESDA, mahimo na ang kaumahan nga mo-duso alang sa pagkahimo nga usa ka farm tourism destination sa Department of Tourism.
Niining panahon sa pandemya, ang pagpang certify sa ATI sa mga learning areas, gipaabut nga makaaghat sa mga Bol-anon nga mosuroy aron magtuki sa mga teknolohiya sa panguma nga mahimong ilang sundogon alang sa ilang kaugalingon unya nga mga pagpananum sa pag-uli sa balay.
Kini usab gilauman nga mas mopalig-on pa sa seguridad sa pagkaon dinhi sa Bohol samtang ang tanan nangaliyup nga unta, maiway na niining nagpadayun nga hulga sa Coronavirus disease.