Sinulat sa Primer
Gitin-aw ni Cong. Edgar Chatto nga magpapili siyag usab sa Kongreso sukwahi sa laing mga intriga nga mobalik siya sa pagkagobernador.
Matud ni Chatto nga magpasublisiya sa Unang Distrito giubanan ang suporta sa katawhan ug panalangin sa Kahitas-an.
Mga sinaligan sa pundok Padayon Bol-anon nga sila si Chatto ug Gob. Arthur Yap uban kang Bise Gob. Rene Relampagos.
Giklaro sa kongresista nga dili siya molansar sa pagkagobernador kontra sa kaugalingong kauban nga gisaligan usab sa ilang grupo sa kalamboan ug kaayohan.
Matud ni Chatto, kaniadto pa silang nagkasinabot nga magpadayon sa serbisyo sa opisyal nga kapasidad nga ilang gihuptan karon.
Ang pahayag ni Chatto gumikan sa mga taho diin mutumaw nga “basin” modagan si Kong. Erico Aristotle Aumentado pagkagobernador.
Sumala sa taho sa Primer, nga nangintriga ang kampo ni Aumentado tungod kay sige ug atake kaniya sa iyang kaatbang.
Naapil sa intrigang balita nga si Chatto moatbang kang Yap sa pagkagobernador.
Ning panahona, kumbinsido ang kongresista nga mas makaserbisyo siyag maayo sa mga Bol-anon pinaagi sa pagsuporta sa mga programa sa kaugmaran ni Yap ug Relampagos.
Iyang gipasabot nga duna siyay mga proyektong nasugdan ug gisagop ni Yap karon apan nagkinahanglan gihapog suportang nasyonal nga masiguro ni Chatto isip kongresista.
Taliwa sa intriga, subli nuong nagpasalamat si Chatto sa pagsalig ug kompiyansa sa katawhan sa katuigan sa iyang publikong pangalagad.