Sinulat ni Elvira Bongosia
Subling nipahinumdom ang Department of Health (DOH) sa publiko nga sundon ang minimum public health standards isip panagang sa Coronavirus disease (Covid).
Kini human nigawas ang artikulo sa kasinaligan nga mantalaan nga adunay kalambingitan sa kasanihan nga The Lancet diin nakalatid ang mga ebidensya nga mapasa ang SARS-CoV-2 virus pinaagi sa “airborne transmission.”
“Ang sabi natin the main transmission nitong virus ay through droplet infection kaya nga yung mga minimum health protocols ay nandyan talaga,” matud pa ni DOH Usec. Maria Rosario Vergeire.
(Ang atong gipasabut nga ang nagunang paagi sa pagtakud mao ang droplet infection mao namugna ang atong minimum health protocols.)
“Pero later on nadagdagan because may studies na lumabas na kapag nasa enclosed space ka, mas nagli-linger sa air yung virus by one and half to three hours sabi ng mga eksperto,” dugang pa niini.
(Hinoon, taod-taod, nadungangan kay adunay pagtuon nga migawas diin kun anaa ang usa ka taw sulod sa usa ka saradong lugar nagpabilin ang virus sa hangin mga usa ngadto sa tulo ka oras matud pa sa mga eksperto.)
Nagtuo si Vergeire nga igo naman ang mga sumbanang gipatuman sa gobyerno, bisan padayon nga gitun-an sa mga eksperto ang posibilidad sa pagkapasa sa virus pinaagi sa hangin.
Gawas sa paghugas sa kamot, physical distancing ug pagsuot ug face mask ug face shield, nagpagawas usab og pahinumdom ang DOH kalabot sa uban pang health protocols nga angay sundon sa publiko.
Matud pa nga kun ordinaryong tawo, mahimo ra ang surgical mask o cloth mask. Apan kadtong naa sa mga ospital, angay sila mogamit sa ‘highly-technical mask’ sama sa N95 mask tungod kay kun naa sa ospital, daghang aerosol generating equipment, mas magdugay nga magpabilin ang virus sa hangin sa mga ospital.
Giingong paaboton pa gihapon sa DOH ang rekomendasyon sa World Health Organization human sa nigawas nga pagtuon.