Sinulat ni Elvira Bongosia
Gipaamping sa National Grid Corporation of the Philippines (NGCP) ang publiko batok sa mga tawo o grupo nga magpaila isip ilang empleyado.
Gitumbok sa NGCP ang mga tawo nga nagpahigayon ug dili awtorisaso nga negosasyon sa Right-of-Way.
Nipagawas ug pasidaan ang NGCP human gitaho nga may mga dili otorisadong tawo ang nakig-negosasyon sa mga residente.
Gani, matud pa ni NGCP Visayas information officer Betty Martinez, may nataho nang insidente sama niini sa lungsod sa Balilihan.
Matud pa ni Martinez, dali lang mailhan ang mga tinuod nga ahente nila tungod sa suot niining identification card, uniform ug mga gidalang tinuod nga dokumento.
Gawas pa niini, magpahigayon ang mga kawani sa maong buhatan ug pakig-negosasyon sa patas ug propesyunal nga pamaagi.
Gihangyo sa NGCP ang publiko nga kun may kadudahang tawo nga makig-transakyon kanila, ipahibalo lamang kini sa pinakaduol nilang buhatan o motawag o text lamang sa mga numero 0917-8476427 o 0918-8476427 o magbilin og mensahe sa tipngcp@ngcp.ph.