Sinulat sa Primer
Mapasalamaton kaayo ang hepe sa labing dakong publikong tambalanan sa Bohol sa tabang sa Kapitolyo sukad sa pagsugod sa pandemya sa Coronavirus disease (Covid) sa niaging tuig.
Dakong kalisdanan sa Gov. Celestino Gallares Memorial Hospital (GCGMH) sa pagpanguna sa health emergency management isip Covid-dedicated facility kon wa pa ang suporta sa probinsiya.
“Very much appreciated” ang ayuda sa kagamhanan sa lalawigan ubos ni Gob. Arthur Yap, matud ni GCGMH chief Dr. Mutya Kismet Tirol-Macuno.
Kini gipadayag ni Macuno ngadto sa gobernador, mga hepe sa departamento sa kagamhanang probinsiyal ug media atol sa press conference sa Kapitolyo bag-ohay lang.
Tukma ang koordinasyon nga gihimo ug makonsiderar nga maayo ang pagdumala sa krisis dinhi bisan pa sa pagsulbong sa mga kaso sa Covid sa nasud, sumala sa doktor.
Sa laing tigom, gipadayag ni Macuno ang iyang huna huna sa pag-pahamtang sa Bohol sa mga pamaagi sa pipila ka mga dapit sa kalibutan diin malamposon ang pagsanta sa pandemya.