ni: Jes B. Tirol
Kiling 25, 2021
Dugang Nga Mga Tigmò
Pasiuna
Ang tigmò maoy usa ka paagi sa pagpaugnat sa útok. Pinaagi sa tigmò mabansay ang imong paunób (logic) ug pangatarungan. Busà angayan lamang nga ato pang dugangan ang mga tigmo nga atong gitukib niadtong niági sa pitlaw.
Dugang Mga Tigmò
28. May langgam gabukad, may mga pakô, apan dili makalupád. — Balay
29. Ako ikaw tigmoan sa tigmo ni Juan Banagan: Bakiki ang iyang balhibo apan ang lawi anaa sa úlo. — Banagan
30. Sa ibabaw ug sa ubos kalayo, sa tunga-túngà salamangkiro. — Bibingkahan
31. Gipugás sa bag-ong hapon, gi-áni sa kaadláwon. — Bituon
32. Balay ni Santa Maria, gilibotán sa mga ispáda. — Bunga sa pinya
33. Sa mungaw pa, buaya, sa mama na kugita. — Bungol sa lubi
34. Putlan ug unyà sumpayan, dugangan ug unyà putlan. — Bungol, sanggutan
35. Sa punóan sák-a, ug sa údlot kanaóga. — Buhok ug sudlay
36. Napuno apan walay sulod. — Bumbo
37. Sakayan nangalingkaling, nanúngsong sa dakong hangin. — Bulan
38. Namatay ang atbang, walâ ikalubong kay gihulat ang silingan. — Butá sa pikas mata
39. Mutyà giputos sa tubig, tubig giputos sa langit, langit giputos sa lag-it, lag-it giputos sa pánit. — Butbot sa lubí
40. Lukâ ni Uka, ang sulod pulos ta-i sa ilaga. — Bunga sa kapayas
41. Sa ibabaw kasudyakan (katunokán), ang ilalom kalusayan. — Bunga sa nángkà
42. Unsang kahoya ang naputos sa bunga? — Bunga
43. Balay ni Iya Pitá gilibutan sa mga kandilà. — Buhatán sa kandilà
44. Sa batà pa nanikúngkong, sa dako na nanikangkang. — Bulig sa saging
45. Dinhi ra ikaw Undô kay molakaw ko ug ako. — Kalabasa; udlot ug bunga
46. Dako nang kabaw dili pa kahibalo mangilo. — Kabaw
47. Kun magapuyô mahimong puyô (bag), kun isalibay mahimong pányò. — kágwang
48. Gigapos ug sa yutà gipúspos. — kasing.
49. Ang inahan nagkamang pa, ang mga anak nagalingkod na. — kalabáså
50. Kun kuhaan modako, kun dungagan mogámay.— Kal-ang sa salog
51. Walay ulo ug walay mga tiil, nganong may dalunggan? — kabán
52. Ang lawas pulos likod ug ang ginhawaan pulos tina-i. —kawayan
53. Anaa ra kanimo wala ka mahibaló. — kamatayon
54. Kahoy nga matános, nakigsulti sa Diyos. — Kandilà
55. Usa kagatos ug kalim-an ka magsuon, usa ray tina-i nila. — kuwentas
56. Kun imong igkita imong patyon, kun dili hikit-an imong daladalahon. — kuto
57. Baka sa Sugbo, miabot dinhi ang inga. — Dalugdog
58. Dili man Pari, dili Sunat (bishop) ug dili amahan, nganong gihagkan? — Dahon sa tabákò
59. Isdang mayamaya, sa sampot tuhoga. — Dagom
60. Sa gamay pa bangkaw, ug sa dako na kalasag (shield). — Dahon sa saging
61. Prinsesang tinagò, adlaw ug gabii kaligo. — Dilà
62. Unsang mananapa ang gitáhod sa katawhan? — Don
63. Tawong hakóg, magahapon kaon dili mabusog. — Galingan
64. Tunob sa karaang tawo dili mapálà. — hákhak
65. Bingata kanang imo kay isulod ko kining ákò. — hagbanan ug lansadera
66. Kinsay ngalan sa amahan sa mga anak ni Juan? — Si Juan
67. Gianák na apan wala pa matáwo. — Itlog
68. Kaban sa Hari kon úkbon dili na mahauli. — – Itlog
69. Miturok nga walay binhì, kon itanom dili mabúhì. — Libgos 70. Naluya og tawag, walay ning tubag. — lingganay