ni Padre Jose “Joesum” Sumampong, Jr.
May 2, 2021
Ika-Lima nga Domingo sa Pagkabanhaw sa Ginoo (B)
EBANGHELYO (Juan 14:1-12)
Si Jesus miingon ngadto sa iyang mga tinun-an, “Ayaw kamog kaguol. Salig kamo sa Dios ug salig usab kamo kanako. Sa balay sa akong Amahan adunay daghang mga lawak, ug moadto ako aron pag-andam og dapit alang kaninyo. Kon dili pa kini tinuod, dili ko unta kamo sultihan niini. Ug kon atua na ako didto ug makaandam nag dapit alang kaninyo, mobalik ako ug kuhaon ko kamo aron bisag asa ako, atua usab kamo. Nahibalo kamo unsaon pag-adto sa dapit nga akong adtoan.”
Apan si Tomas miingon kaniya, “Ginoo, wala kami mahibalo kon asa ka paingon, busa unsaon man namo pagkatultol sa dalan?”
Si Jesus mitubag, “Ako ang dalan, ang kamatuoran, ug ang kinabuhi; walay makaadto sa Amahan kon dili moagi kanako. Karon nga nakaila na kamo kanako, makaila usab kamo sa akong Amahan; ug sukad karon nakaila na kamo kaniya ug nakakita kaniya.” Si Felipe miingon kaniya, “Ginoo, ipakita kanamo ang Amahan, ug igo na kana kanamo.”
Si Jesus mitubag, “Dugay na akong nakig-uban kaninyong tanan, ug wala ka ba gihapon makaila kanako, Felipe? Ang nakakita kanako, nakakita usab sa Amahan. Busa nganong nag-ingon ka man, ‘Ipakita kanamo ang Amahan?’ Wala ka ba motuo, Felipe, nga ako anaa sa Amahan ug ang Amahan anaa kanako? Wala maggikan kanako ang mga pulong nga gisulti ko kaninyo. Ang Amahan nga ania kanako nagbuhat sa iyang kaugalingong buluhaton. Tuohi ninyo nga ako anaa sa Amahan ug nga ang Amahan ania kanako. Kon dili, panuo kamo kanako tungod niining mga buhat. Sultihan ko kamo: ang motuo kanako magbuhat sa akong gibuhat, ug magbuhat siyag labaw pa niini, kay moadto man ako
oOo
Ang Kahulogan Sa Ebanghelyo (Juan 14:1-12)
1 Si Jesus miingon ngadto sa iyang mga tinun-an, “Ayaw kamog kaguol…”
Kining dapita sa Ebanghelyo nahitabo niadtong panahon sa katapusang panihapon, isip mga panugon kang Jesus.
Ang nasinati sa mga Apostoles usa ka trahedya. Si Jesus bag-ohay pa lamang nga mipahayag sa pagbudhi kang Judas kinsa karon migawas gikan sa lawak aron sa pagpakig-kunsabo sa mga kaaway ni Jesus (Juan 13:21-30). Gawas pa niini, si Jesus usab mipahibalo kanila nga dili sila makaadto sa iyang pagaadtuan (Juan 13:31-36). Ug unya gitagna ni Jesus nga si Pedro molimod kaniya sa makatulo (Juan 13:37-38). Mao nga masabot nato kon unsa kabug-at ang ilang gihunahuna ug ang ilang gibati.
Sa atong kinabuhi usab aduna gayoy mga panahon nga adunay mga mabug-at nga palas-anon: ang walay igong trabaho, ang pagka-biktima sa trahedya, ang dili-seguradong kaugmaon, ang pagka-baldado, ang pagka-tigulang, ang wala nay pagkaalim nga sakit, ug uban pa. Kon matagbuan kini, bisan pa gani ang labing masaligong tawo usahay mobatig kalisang.
1b Salig kamo sa Dios ug salig usab kamo kanako.
Gitambagan ni Jesus ang iyang mga tinun-an sa pagbaton og pagsalig. Niining maong mga panghitabo ang bugtong nga kasaligan mao lamang gayod ang Dios. Bisan pa kon daw ang tanan mapukan, apan nagpabilin gayod si Jesus nga masaligon.
2 Sa balay sa akong Amahan adunay daghang mga lawak, ug moadto ako aron pag-andam og dapit alang kaninyo. Kon dili pa kini tinuod, dili ko unta kamo sultihan niini.
Dinhi gipadayag ni Jesus ang dili-matugkad nga misteryo sa iyang pagka-tawo (incarnation): sa iyang pagka-tawo siya lahi sa Amahan.
Wala gayod angkona ni Jesus ang himaya alang sa iyang kaugalingon. Hinoon kanunay gayod nga iyang gipahimutang ang maong himaya ngadto sa Amahan. Kita iyang gitun-an sa paghimog ingon: ang paghimaya sa langitnong Amahan.
Maoy hinungdan nga ang iyang kamatayon mao ang pagbalik ngadto sa balay sa Iyang Amahan. Didto makaplagan ni Jesus ang Iyang Amahan nga nahigugma Kaniya ug Iya usab nga gihiguma.
3 Ug kon atua na ako didto ug makaandam nag dapit alang kaninyo, mobalik ako ug kuhaon ko kamo aron bisag asa ako…
Mga pulong nga natingban sa matinud-anong gugma. Dili diay kay ang Ginoo atua sa halayong dapit. Kondili ang Dios ania labing haduol, nakig-uban kanato. Siya nakighinabi kanato uban sa labing masaligong pulong.
3b atua usab kamo.
Si Jesus miabli alang sa tanang tawo og bag-ong kapanigurohan nga molungtad sa hangtud. Ang iyang gitugyan nganha kanato mao ang Balaang Kinabuhi o Hingpit nga Kinabuhi (Divine Life or Fullness of Life). Kay kon atong sutaon ang katuyoan sa tawo mao man gayod ang Dios. Naglawig kita padulong sa Dios. Mao nga giingnan kita niya “Ayaw kamog kaguol.”
4 Nahibalo kamo unsaon pag-adto sa dapit nga akong adtoan.” 5 Apan si Tomas miingon kaniya, “Ginoo, wala kami mahibalo kon asa ka paingon, busa unsaon man namo pagkatultol sa dalan?”
Ang pangutana ni Tomas mao ang pangutana sa matag usa kanato. Gikinahanglan nga makatultol kita sa dalan paingon sa Dios.
6 Si Jesus mitubag, “Ako ang dalan, ang kamatuoran, ug ang kinabuhi; walay makaadto sa Amahan kon dili moagi kanako.
Si Jesus wala gayod maghunahuna sa bisan unsang babag sa atong pagpaingon sa “Balay sa Amahan”. Alang niadtong mituo si Jesus mao lamang ang paagi nga kita makatultol niini.
7 Karon nga nakaila na kamo kanako, makaila usab kamo sa akong Amahan; ug sukad karon nakaila na kamo kaniya ug nakakita kaniya.”
Samtang ania pa kita niining kalibutana dili gayod sa hingpit nga kita makaila sa Dios. Apan si Jesus mipadayag kanato tipik sa Amahan.
8 Si Felipe miingon kaniya, “Ginoo, ipakita kanamo ang Amahan, ug igo na kana kanamo.” 9 Si Jesus mitubag, “Dugay na akong nakig-uban kaninyong tanan, ug wala ka ba gihapon makaila kanako… Busa nganong nag-ingon ka man, ‘Ipakita kanamo ang Amahan?’ 10 Wala ka ba motuo, Felipe, nga ako anaa sa Amahan ug ang Amahan anaa kanako?
Gipasabot ni Jesus kon kinsa gayod siya. Siya “anaa sa Amahan ug ang Amahan anaa” Kaniya! Si Jesus matuod nga Dios ug matuod nga tawo!
10b Wala maggikan kanako ang mga pulong nga gisulti ko kaninyo. Ang Amahan nga ania kanako nagbuhat sa iyang kaugalingong buluhaton. 11 Tuohi ninyo nga ako anaa sa Amahan ug nga ang Amahan ania kanako…12 Sultihan ko kamo: ang motuo kanako magbuhat sa akong gibuhat, ug magbuhat siyag labaw pa niini, kay moadto man ako sa Amahan.”
Ang paraiso o ang langit dili usa ka dapit nga gisaad lamang nga atong puy-an sa umaabot aron mahupay kita sa mga daghang kabilinggan sa kinabuhi niining kalibutana. Bisan tuod nga ang kahingpitan niini umaabot pa, apan nagsugod na kita sa pagsinati niini diha sa “atong pagpadayon sa panggibuhaton ni Jesus. Dili lang kay magpaabot lang kita sa langit; sugdan nato kini sa pagkab-ot samtang ania pa kita dinhi niining atong kalibutan karon.
MAINITON NGA PAGTIMBAYA SA MGA IGSUONG KAPARIAN SA DIYOSESIS SA TAGBILARAN NGA GIPANGULOHAN NI OBISPO ABET S. UY,D.D.
SA ILANG MGA BAG-ONG TAHAS SA MGA NAGKADAIYANG PAROKYA UG BUHATAN.
ATO UNTA SILANG KINASINGKASING NGA DAWATON UG UYONAN SA BISAN UNSAY ILANG IKATAMPO SA HAPSAY NGAPAGLAWIG SA ATONG DIYOSESIS….
ASENSO PA MORE!