Sinulat ni Elvira Bongosia
Gipahinumdom sa Department of Health (DOH) nga kinahanglan pa gihapon mopaubos sa proseso sa screening ang mga tawo nga bakunahan sa ikaduhang dose sa bakuna batok sa Coronavirus disease (Covid).
Nipagawas ug pahayag ang DOH human nataho nga wala nay himoong screening alang sa ikaduhang tupok sa bakuna batok sa Covid.
Matud pa ni DOH Undersecretary Maria Rosario Vergeire, dili sakto kun may dili mosunod sa saktong screening sa pagbakuna.
Dugang pa ni Vergeire nga kun unsa ang protocol sa pagbakuna sa unang dose, mao gihapon ang himuon sa paghatag sa ikaduhang dose sa bakuna.
Gitumbok sa kalihim nga ang mga bakunahan kinahanglang ma-check kun may sintomas sila sa Covid o di kaha gi-atake sa ilang comorbid, sa dili pa sila bakunahan.
Taliwala niini, miingon si Vergeire nga mahimong dili na pangayuan ug “informed consent” ang bakunahan sa ikaduhang dose sa bakuna.