Sinulat ni Elvira Bongosia
Dungan sa pagsaulog sa Kadaugan sa Mactan sa pagpanguna sa kaisog ni Lapu-Lapu, gi-ila usab ni Presidente Rodrigo Roa Duterte ang mga medical frontliner, nga matud pa adlaw-adlaw nga nagsagubang sa pandemya.
Matud pa ni Duterte nga kun gihinumdoman man karon ang gipakita nga kaisog sa bayani nga si Lapu-Lapu, angay usab nga dungan nga hinumdoman ang gisagubang nga kakuyaw sa mga health worker.
Giingong gisugal nila ang ilang kinabuhi, aron lang masiguro ang kaluwasan sa mga kaubang Pilipino, taliwala sa peligrong dala sa Coronavirus disease (Covid).
“Today, we remember their gallantry by honoring the worthy heirs of Lapu-Lapu’s legacy. Our medical and essential frontliners who in face of danger caused by Covid-19 pandemic continue to risk their lives, their own lives to ensure for the safety of their fellow Filipinos,” pahayag pa ni Duterte. (Karon, atong gihandum ang ilang kaisog pinaagi sa pagpasidunggog sa mga sumusunod sa kabilin ni Lapu-Lapu. Ang atong mga medical ug importanteng frontliners nga giatunang ang kakuyaw nunot sa pandemya sa Covid-19 nga padayon nga ilang gibutang ang ilang kinabuhi sa kakuyaw aron mapanalipdan ang maayong kahimtang sa ilang isig ka Pilipino.)
“Let us draw inspiration from the heroes of the past and present as we overcome pandemic and rebuild a stronger and more resilient nation,” dugang pa sa Pangulo. (Kuhaan nato ug inspirasyon ang mga bayani sa kahapon ug karon aron magmadaugon ta batok sa pandemya ug makamugna kita ug kusgan ug lig-on nga nasud.)
Panawagan pa sa Presidente ngadto sa publiko, mokuha og inspirasyon sa mga nangagi ug kasamtangang bayani taliwala sa ginahimong pagsagubang karon sa pandemya, hangtod sa makabangon ug balik ang nasud.
Nanghinaot ang Presidente nga mahimong mahinongdanon ang pagtimaan sa nahimong kalamposan sa Mactan, sa pagpanguna matud pa sa iyang idolo nga si Lapu-Lapu.