Sinulat ni Elvira Bongosia
Nipasidaan ang Department of Health (DOH) sa publiko batok sa paggamit ug aspirin sa mga pasyente nga may Coronavirus disease (Covid) tungod kay mahimo kining makamatay imbes nga makaayo.
Kini ang gipagawas nga pahayag sa DOH kalabot sa nikatap nga pekeng impormasyon sa social media nga nang-awhag sa katawhan nga gamiton ang aspirin tungod kay matud pa dili man gikan sa virus ang Covid apan tungod sa bacteria.
Matud pa sa gipakatap nga post, ang Russia nag awtopsiya ug sa ka namatay sa Covid ug dinhi giingong nadiskubre nga ang bacteria matud pa ang makaingon ug blood clotting o pag bugon-bugon sa dugo, mao nga maglisod ang pasyente sa pagginhawa.
Apan gitumbok sa DOH nga usa ka matang sa virus ang Covid ug dili bacteria mao nga dili angay ipa-inom sa pasyente ang aspirin ug walay abiso sa doktor tungod kay delikado ug kuyaw kini.
“Hindi inirerekomenda ang pag-inom ng aspirin pangontra sa COVID. Ang maling pag-inom nito ay maaaring magdulot ng pagdurugo sa katawan at pagkamatay. Ito ay binibigay lamang sa mga pasyenteng kailangang mai-admit sa ospital,” matud pa sa pahayag sa DOH.
(Dili gisugyot ang pagtumar ug aspirin batok sa Covid. Ang sayop nga pagtumar sa maong tambal maoy hinungdan pagdugo sa lawas ug makamatay. Gihatag lang kini sa mga pasyente nga kinahanglan dad-on sa ospital.)
Nanawagan ang DOH sa publiko nga susihon kanunay ang mga impormasyong nga anaa sa social media kon kini nagakigan sa mga lehitimong tinubdan.