Sinulat ni Dave Albarado
Gilibkas na sa Tubigon ang pagdili sa mga kalihukan nga relihiyoso.
Apan, gitahasan ni Mayor William Jao ang mga parokya ug mga Hermano ug Hermana sa kapilya ug mga pangulo sa mga kongregasyon sa estrikto nga pagpatuman sa minimum public health “standards and protocol” nga gilatid sa Municipal Inter Agency Task Force (MIATF) samtang gipatuman ang Modified General Community Quarantine.
Matud pa ni Mayor Jao, subay sa rekomendasyon sa MIATF, gilibkas na ang pagdili sa mga misa ug novena sa mga kapilya agi ug pagpahiluna sa mga kapistahan.
Subay sa walay numero nga Memorandum nga gipagawas sa mayor niadtong Abril 23, 2021, gipailawom sa lungsod ang pagdili sa mga misa ug novenario sa mga kapilya, gawas lamang sa tulo ka mga parokya sa lungsod.
Kini sanglit namatikdan ang pagsaka na usab sa kaso sa Corona virus disease, ug nahadlok ang mga tinugyanan nga ang mga pagtapok-tapok bisan sa mga kapilya nga nangandam sa mga kapistahan sa barangay, makadungan unya sa mga kaso.
Niadto usab, gipasabut sa mayor pinaagi sa memorandum nga ang pagdili, wala maglakip sa mga misa ug kalihuan nga relihiyoso nga nagbase sa mga parokya.
Gawas sa Parokya ni San Isidro Labrador sa Centro Tubigon, may parokya usab sa San Juan dela Cruz sa Cahayag ug parokya sa Santa Cruz sa Cawayanan, nga manggipista usab sa sunod nga mga adlaw.
Hinuon, dungan sa paglibkas sa pagdili, gipahinumdom pinaagi sa bag-ong memorandum sa mayor ngadto sa mga opisyales sa simbahan ug mga kapilya sa hugot gayud nga pagsunod sa protocol.
Pugos nga ipatuman, matud pa sa naasoy nga memorandum sa mayor ang contact tracing protocol nga maglista sa mga mingtambong sa misa o kalihukan lakip na ang ilang contact numbers, aron may masubay sa mga tinugyanan kun may panginahanglan.
Kinahanglan usab ang tanan moagi sa thermal scanning, magpahiluna sa sakto ug igo nga disinfecting stations nga may alcohol, ug mga footbath nga tinambalan.
Ipatuman usab ang 50 porsyento nga kapasidad sa lugar nga tapokan, pagsuot sa sakto nga face mask sa tanang higayon samtang naa sa kalihukan, pagsul-on sa sakto nga face shield, pagpatuman sa sakto nga paglihok sa hangin o ventilation ug pagpasunod sa sakto nga physical distancing.
Gitahasan usab sa memorandum ang mga parokya, ug mga pangulo sa kapilya nga motaho ngadto sa MIATF kon aduna man ugaling panghitabo nga wala damha ug makahulga sa kaluwasan sa mga katawhan.