Sinulat ni Elvira Bongosia
Nalangawan nga sugdan sa Philippine Statistics Authority (PSA) ang pagpanghatag sa unang hugna sa Philippine IDs, alang sa mga nakaparehistro na sa Step 1 ug Step 2 sa PhilSys o Philippine Identification System.
Matud pa sa gipagawas nga pahayag sa PSA, may 956 ka ID cards na ang na-prenta sa Bangko Sentral ng Pilipinas (BSP) sa inisyal ID card production nga ipadala sa PHILPost, sa mga lalawigan nga unang nakaparehistro sa national ID.
Apil na dinhi ang La Union, Ilocos Sur, Nueva Ecija, Bulacan, Pampanga, Rizal, Cavite, Iloilo, Bacolod Albay, Bohol, Masbate Capiz, Negros Oriental, Cebu ug Davao.
Nakabutang ang PhilIDs sa envelopes kauban ang PhilSys Number (PSN) sa mga registrants.
Samtang subling gipahinumdoman sa PSA ang mga makadawat ug ID nga ampingan ang transaction slip niini ug gamiton lang ang PhilSys Card Number (PCN) nga naa sa PhilID matag mohimo ug transaksyon sa publiko ug pribadong sektor, sama sa mga government institutions ug bangko.
Kahinumdoman nga una nang gi-anunsyo sa National Economic and Development Authority (NEDA) nga mokabat na sa 33.4 milyong Pilipino ang nakahuman sa Step 1 sa National ID.