Sinulat ni Dave Albarado
Walay panagbangi ang kagamhanang probinsyal ug ang pundok sa mga doktor bisan hinoon adunay mga takna diin wala magsibo ang posisyon sa matag usa ka nila kabahin sa pagmaneho sa pandemya dinhi sa lalawigan, mao kini ang unod sa usa ka hiniusang pamahayag sa Provincial Government of Bohol (PGBh) ug ang Bohol Medical Society (BMS) nga migawas niadtong Huwebes, Mayo 6, 2021.
Sa usa ka hiniusang pahayag nga pinirmahan ni Gob. Art Yap ug BMS president Jefferson Ong nga bisan tuod nga adunay panaglalis ang PGBh ug ang BMS sulod sa Bohol Inter Agency Task Force (BIATF), kini makatabang man sa kawsa ug dili makadaot.
Isip usa ka collegial body nga mao ang BIATF, ang mga lalis ug debate normal na kini ug pinaagi sa mga lalis ug debate hayan makit-an sa tagsa-tagsang pundok kon unsa ang tinuod nga kahimtang sa pandemya, sumala pa sa hinusang pamahayag.
Dili na ikatingala nga adunay mga panaglalis sulod sa BIATF kay ang maong kahugpungan ang mga sakop nagagikan sa nagkalain laing mga sektor nga ang matag usang sektor aduna may nagkadaiyang interes.
Matud pa ang sektor sa patigayon kay apil usab sa BIATF mao sila ang ilang iduso mao ang interes nga adunay kalambingitan sa ekonomiya.
Gipahimangnuan sa PGBh ug BMS ang publiko nga wala pa mahuman ang krisis nga ang hinungdan mao ang pandemya.
Dugang pa sa mga pundok, nanawagan sila nga maghiusa ang tanan samtang nagkasaka ang mga kaso sa Coronavirus disease (Covid) sa lalawigan.
Kinahanglan nga maayo ang pagmaneho sa mga kaso sa Covid dinhi aron muubos ang gidaghanon sa mga kaso nga natala sa lalawigan, matud pa sa hiniusang pahayag.