ni Padre Jose “Joesum” Sumampong, Jr.
PAGSAKA SA LANGIT SA ATONG GINOO (B)
Mayo 16, 2021
EBANGHELYO (Mateo 28: 16-20)
ng napulog-usa ka tinun-an miadto sa Galilea didto sa bungtod nga paadtoan kanila ni Jesus. Ug sa ilang pagkakita kaniya, gisimba nila siya, bisan tuod may pipila kanila nga nagduhaduha. Miduol si Jesus ug miingon kanila, “Gihatag kanako ang tanang gahom sa langit ug sa yuta. Busa panlakaw kamo ngadto sa tanang katawhan sa tibuok kalibutan ug himoa sila nga akong mga tinun-an, ug bunyagi sila sa ngalan sa Amahan, sa Anak ug sa Espiritu Santo, ug tudloi sila pagtuman sa tanan nga akong gisugo kaninyo. Ug hinumdomi! Ako mag-uban kaninyo sa kanunay hangtod sa katapusan sa kalibutan.” Ang Ebanghelyo sa Ginoo.
oOo
Ang Kahulogan Sa Ebanghelyo (Mt 28:16-20)
16a Ang napulog-usa ka tinun-an…
Napulog usa lamang sila. Pagkadiyutay alang sa hilabihang kadakong tahas.
Wala diay magsugod ang Simbahan og daghang mga tawo. Apan diha sa kagamay sila epektibo. Nagmalampuson. Mao diay ngano nga sa atong panahon karon anaa usab ang Gagmayng Simbahanong Katilingban (GSK). Tungod kay dyutay lamang ug managsilingan, adunay purohan nga epektibo.
16b miadto sa Galilea…
Galilea! Mao ang dapit nga gitumbok ni Jesus nga iyang pagaadtoan atol sa katapusang panihapon: “Apan tapos ako mabanhaw mouna ako kaninyo sa Galilea” (Mt. 26:32). Mao usab kini ang dapit nga gisulti sa Angel duol sa walay sulod nga lubnganan: “Ug unya adtoa dayon ug sultihi ang iyang mga tinun-an nga nabahaw siya, ug karon mag-una siya kaninyo ngadto sa Galilea” (Mt. 28:7).
Galilea! Gihatagan ni San Mateo og talagsaong kahulogan sumala sa gipanagna sa mga propeta: “…Galilea sa mga dili Judio” (Mt 4:15) ug “…ang Galilea nga gipuy-an sa mga lang-yaw” (Isaias 9:1).
Galilea! Dapit nga puno sa kinabuhi. Ang mga tawo nagagikan sa mga nagkalainlaing dapit. Bukas sa mga langyaw. Dinhi anaa ang nagkadaiyang pagtuo ug pagka-walay pagtuo.
Galilea! Mao gayod ang dapit nga iyang gigikanan. Ang lungsod sa Nasaret sakop sa Galilea.
Usa kini ka pagtulun-an ngano nga kinahanglan gayod nga adto ta moapil sa pundok nga atong kaugalingon: Ang atong mga silingan mao ang Galilea sa atong Gagmayng Simbahanong Katilingban (GSK); ang kapilya nga labing duol sa atong dapit, diin kita mahisakop, mao ang atong Galilea; ang atong parokya mao ang Galilea; ang atong diyosesis mao ang atong Galilea; ang atong Simbahang Katoliko mao ang atong Galilea.
16c didto sa bungtod nga paadtoan kanila ni Jesus.
Sa tibuok Bibliya, ang “bungtod” maoy usa ka talagsaong dapit diin didto mahitabo ang “panagtagbo sa Dios ug sa tawo” (encounter with God). Didto sa mga “bungtod” ang dapit nga gipahayag sa Dios ang iyang kabubut-on. Sa “bungtod” gud anaa ang tingog sa kahilom o kalinaw (sound of silence): ang bungtod mao ang giwalihan ni Jesus mahitungod sa nga tawong bulahan o Beatitudes (Mt. 5:1), anaa ang bungtod sa pagkabalhin sa panagway ni Jesus o transfiguration (Mt 17:1), anaa ang bungtod diin si Jesus nag-ampo (Mt 14:23), anaa ang bungtod nga si Jesus mihimog milagro sa pagdaghan sa pan (Mt. 15:32).
Giisip ba nato ang atong matag semanang panagtigum sa GSK uban sa atong mga silingan nga usa ka “bungtod”? Ang pag-apil sa Misa, labi na sa Domingo ug pyestang iglilihi, nga usa ka “bungtod”?
17 Ug sa ilang pagkakita kaniya, gisimba nila siya, bisan tuod may pipila kanila nga nagduhaduha.
Pagsimba ug pagduhaha! Duha ka panagbangi sa kahulogan. Bisan sa “bungtod” anaa pa gihapon ang pagka-walay pagtuo. Ang pagsimba mao ang kadaugan batok sa atong pagka-walay pagtuo.
Dili usab ikalimod nga bisan sa atong GSK cluster anaa pa gihapon kadtong nagmagahion. Tingali wala pa makabaton og igong pagtuo. Kon sila makakat-on pa lamang sa pagsimba, makabaton ra gayod sila lig-ong pagtuo.
18a Miduol si Jesus ug miingon kanila…
Laing hitabo nga si Jesus mao ang miduol sa iyang mga tinun-an mao kadtong pagkabalhin sa iyang panagway o transfiguration. Pagkalayo gayod sa distansya tali kanato ug sa Dios. Apan ang Dios maoy miuna sa pagpaduol ngari kanatong mga tawo. Sa ato lamang kaugalingon, wala kitay igong gahum sa pagtuo. Ang pagtuo maoy usa ka lihok nga hatag sa Dios ngari kanato. Ang atong kaakuhan mao ang pagtubag sa gasa sa pagtuo (response to the initiative of God).
Ang GSK mao ang kahimanan sa pagsinati sa buhing Dios uban sa atong mga silingan. Sa panahon sa panagtigum ang Dios nakigduol kanato unsa may atong tubag?
18b “Gihatag kanako ang tanang gahom sa langit ug sa yuta.
Dinhi madungog ta ang pag-angkon ni Jesus sa iyang pagka-sama sa Iyang Amahan. Anaa kaniya ang tanang gahom! Mao nga angay gayod nga si Jesus mao ang Ginoo ug Magbubuot sa atong kinabuhi!
19a Busa panlakaw kamo ngadto sa tanang katawhan sa tibuok kalibutan ug himoa sila nga akong mga tinun-an,
Human sa tanang gahom, anaa mosunod gayod ang tanang buluhaton ngadto sa tanang katawhan aron mahimo silang mga tinun-an.
19b ug bunyagi sila sa ngalan sa Amahan, sa Anak ug sa Espiritu Santo
Laraw ni Jesus nga ang tibuok kalibutan magpailawom ubos sa iyang gahum pinaagi sa bunyag.
20a ug tudloi sila pagtuman sa tanan nga akong gisugo kaninyo.
Ang katekismo dili lamang kay pagtudlo og kahibalo nga anaa sa utok, kondili ang pagbaton og kahanas sa paghimo sa tibuok kinabuhi sa nahisubay sa kabubut-on ni Kristo.
Ako na bang gitugyan ang tanan sa akong kinabuhi diha kang Kristo?
20b Ug hinumdomi! Ako mag-uban kaninyo sa kanunay hangtod sa katapusan sa kalibutan.”
Ang gahum ni Kristo nga lukop sa tibuok kalibutan, anaa usab lukop sa tanang panahon.Aduna ba akoy panahon alang sa mga buluhaton nga Kristohanon?