Sinulat ni Dave Albarado
Dili tinuod nga wala pagamita si Gob. Arthur Yap ug iyang mga kauban sa covered court sa barangay Tipolo, Ubay sumala pa sa barangay kapitana sa na-asoy nga barangay.
Pinaagi sa usa ka pakighinabi sa telepono sa The Bohol Tribune niadtong Martes, Mayo 11, 2021, misulti si Tipolo barangay kapitana Maila Zapanta nga wala siya’y plano nga dili ipagamit ang covered court sa Tipolo, Ubay diin didto ipahigayon unta ang pagpang-apod-apod sa hinabang ngadto sa mga barangay nga gikan sa kagamhanang probinsyal. Si Yap ug mga kaubanan nahidangat didto sa lungsod sa Ubay alang sa pagapod-apod sa hinabang sa mga barangay didto niadtong adlaw Domingo, Mayo 9, 2021.
Matud sa usa ka taho sa Provincial Information and Media Relations (PRIMER) office, si Yap ug mga kauban wala nadayon sa Tipolo aron ipang-apod-apod ang hinabang nga pinansyal alang sa mga barangay tungod kay giingong wala sila pagamita ni Zapanta sa covered court.
.
Sumala pa sa taho sa PRIMER, wala pagamita ang gobernador ug mga kauban sa maong covered court tungod kay matud pa ang maong pasilidad kang Cong. Aris Aumentado ug ang kapitan anaa sa pundok sa kongresista sa segundo distrito.
Sa pakighinabi sa The Bohol Tribune kang Zapanta, miingon ang kapitana nga apeke kaayo ang gihimong pahibalo ngadto kaniya gikan sa mga gitugyanan ni Yap sa kapitolyo.
Dugang pa sa kapitana nga andam ug tagana siya nga muabi-abi sa mga bisita sama sa gobernador ilabi nga nagdala si Yap ug hinabang alang sa mga barangay.
Ang matag barangay sa Bohol hatagan ug tag P25,000 isip ayuda gikan sa kagamhanang probinsyal ug panahon na unta kadto sa mga barangay sa lungsod sa Ubay ang mahatagan ug hinabang.
Dugang pa gyud ni Zapanta nga tungod kay apeke na sa panahon ug aduna pud siyay laing lakaw ni-adtong adlawa ug magpa check-up pud sya sa pagka palis sa Domingo, mihangyo si Zapanta nga adto nalang himoon ang pagpan-apod-apod sa mga hinabang alang sa mga barangay didto sa barangay Union.
Matud pa sa kapitana nga gisirad-an ang covered court tungod kay adunay mga batan-on nga magbasketball, diin ang basketball ginadili gihapon tungod karong panahona tungod kay ang Bohol ubos man sa modified general community quarantine (MGCQ).
Sumala pa ni Zapanta, kun nahatagan lang sya ug pahibalo bisan usa ka adlaw sa dili pa moabot ang gobernador ug mga kauban, makapangita pa siya ug paagi aron mahinluan ang covered court ug makaandam sa pagduaw sa usa ka importanteng tawo sama ni Yap.
Giasoy ni Zapanta nga gidawat sa iyang barangay treasurer ang hinabang gikan sa kagamhanang probinsyal. Dugang pa niya nga walay giingong gisugo siya ni bisan kinsa nga dili dawaton ang ayuda gikan sa kagamhanang probinsyal.