Sinulat ni Elvira Bongosia
Makig-alayon na ang Department of the Interior and Local Government (DILG) sa mga Local Government Units (LGUs) ug Philippine National Police (PNP) aron mahiusa ang mando ni Presidente Duterte nga dakpon ang mga tawo nga wala nagsuot ug face mask.
Matud pa sa pahayag ni DILG Usec. Jonathan Malaya, kinahanglan nilang ma-ingnan ang LGUs aron masusi ang mga ordinansa ug ang PNP alang sa pagtuki sa utlanan sa direktiba sa presidente.
Gitumbok ni Malaya nga ang mga lokal nga ordinansa ang maligsan niini mao nga kinahanglan usab nilang tan-awon kun unsaon nila mapatuman ang direktiba sa presidente.
Gidugang usab ni Malaya nga ang mga LGU na ang magpatuman sa mga silot sa mga dili mosunod sa pagsuot ug face masks.
Kahinumdoman nga gipasidan-an ni Duterte ang publiko nga arestuhon sa pulis ang wala nagtarong ug suot sa ilang face mask.
Tungod kini sa pagkadismaya sa pangu sa nasud ang padayong pagsaka sa kaso sa Coronavirus disease (Covid) sa nasud ug usa sa giingong hinungdan mao ang dili tarong nga pagsuot sa mask.
Gipasabot ni Duterte nga kinahanglang mag-istrikto sa pagpatuman sa minimum health protocols tungod kay kulang na sa pondo ang gobyerno alang sa panginahanglan sa mga naangin sa pandemya.
Gawas niini, daghan nga matud pa ang namatay tungod sa Covid ug puno pa usab ang mga ospital sa mga pasyente ilabi na didto sa kauluhan.