Sinulat ni Dave Albarado
Dugang nga 16,140 ka mga doses sa bakuna nga ginama sa AstraZenica ang miabot na sa Bohol aron itupok sa mga naapil sa priority list nga mga frontliners.
Miabot ang mga supply sa bakuna gikan sa Sugbo niadtong Miyerkules sa gabi-i, Mayo 12, 2021, didto sa pantalan sa Tubigon, matud pa ni Anthony Damalerio ang pangulo sa Provincial Disaster Risk Reduction and Management Office sa kapiolyo. Apil si Damalerio sa misugat sa pag-abot sa supply sa bakuna sa AstraZenica, matud pa sa mga taho.
Midugang si Damalerio pagtaho nga, mokabat sa 5,000 ka mga doses nga miabot ug itupok kini sa mga frontliners alang sa ilang ika-duhang dose, ug ang nahabilin idapat ngadto sa mga apil sa priority list nga frontliners alang sa ilang unang dose.
Sumala pa kang Damalerio, ang mga bakuna nga gihimo sa AstraZenica tua na gitugyan sa Provincial Health Office (PHO) ug gibutang kini sulod sa usa ka cold storage facility sa dili pa itupok sa mga frontliners dinhi sa Bohol. .
Sa pagkakaron, dili momenus sa kinatibuk-ang 70,020 ka mga doses sa bakuna ang miabot dinhi sa Bohol gikan sa nasudnomg kagamhanan pinaagi sa Department of Health (DOH).
Dugang misulti si Damalerio nga sa takna nga tanang mga frontliner sa lalawigan natupokan na sa bakuna, isunod dayon ang mga senior citizens kay sila ang sunod sa priority list nga gimando sa pangagamhanang nasyonal.
Gipaabot nga sa mga musunod nga semana, dugang pa nga mga doses sa bakuna ang moabot sa Bohol.