Sinulat ni Elvira Bongosia
Kaso nga kriminal o administratibo ang ipahamtang alang sa mga lokak nga opisyal kun sila napakyassa pagpugong sa pagtapok-tapok sa mga katawhan, bahad sa Department of Interior and Local Government (DILG).
Dereliction of duty ang mahimong kaso kun wala makapatuman ang mga lokal nga opisyales sa pagpatuman sa minimum health protocols, kini subay sa Revised Penal Code nga mahimong kaso nga kriminal, gawas pa sa administratibong salaod, dugang nga bahad sa DILG.
Matud pa ni DILG Sec. Eduardo Año, dili buot sa DILG nga moabut pa sa punto nga kinahanglan adunay silot nga ipahamtang tungod wala mapatuman ang lagda kabahin sa mga tapok-tapok.
Subay sa sumbanan nga gipagawas sa Inter-Agency Task Force (IATF) Against COVID-19 niadtong Abril 15, 2021, gidili ang pagtapoktapok gawas ug sulod sa mga balay sa mga lugar nga ubos sa Enhanced Community Quarantine (ECQ), Modified ECQ (MECQ), ug General Community Quarantine (GCQ).
Sa mga lugar nga anaa sa ubos sa Modified General Community Quarantine, gitugot man ang pagtapoktapok, apan kini alang lamang sa katunga sa kadaghanon sa kapasidad sa lugar nga gitapokan.
Hinuon, daghan ang mga lokal nga kagamhanan ang manglusot sa rason nga ang ilang gipatapok, alang kuno sa pagpang-apud-apod sa serbisyo sa kagamhanan kay ang mga kalihokan nga diin naghatag ug kaayohan getugutan man sa mga lugar nga ubos sa ECQ, MECQ, GCQ, ug MGCQ.
Ang pagtapok-tapok sama sa pagsimbagidili sa mga lugar ubos sa ECQ, samtang gitugot kini sa mga lugar nga anaa sa MECQ subay sa 10 ngadto sa 30 porsyentolamang sa seating capacity sa maong lugar, subay usab sa pagtugot sa lokal nga kagamhanan.
Sa mga lugar nga ubos sa GCQ, mahimo ang pagtapok-tapok sa mga mga simbahan o religious activities kon anaa lamang sa 30 ngadto sa 50 porsyento sa kapasidad sa lugar ang gitugotan.
Sa mga lugar nga ilawom sa MGCQ, mahimo mosimba o mosalmot sa mga religious activities basta sa katunga lamang sa kapasidad sa lugar ang masudlan.
Ang sa pagmisa sa patay ug serbisyo sa mga purenarya alang sa mga namatay sa Covid, kini tugotan sa mga lugar nga ubos sa ECQ ug MECQ apan alang lamang sa mga sakop sa banay sa namatay.
Sa mga luigar nga ubos sa GCQ, dili molapas sa 30 porsyento ngadto sa 50 porsyento sa kapasidad sa lugar ang makatambong sa mga paglubong samtang tugotan sa 50 porsyento nga kapasidad kon kini anaa sa lugar ubos sa MGCQ.
Subay niini, giaghat sa DILG ang publiko sa pagpasaka ug kaso batok sa mga opisyales nga nakalapas sa lagda, ngadto sa DILG Regional Offices o sa DILG Emergency Operations Center sa dilgeoc.complaint@gmail.com o (02) 8876-3454 local 881 ngadto sa 884.