Sinulat ni Dave Albarado
Tukion sa Sangguniang Panlalawigan (SP) ang giingong panghitabo nga adunay mga nangamatay nga mga isda nga tilapia nga gitawag usab nila ug ‘fish kill’ sa pipila ka mga dapit sa Bohol, ug kini posible moresulta ngadto sa pagnihit sa supply sa isda nga maoy mahimong laing hinungdan sa pagsaka sa presyo sa isda dinhi sa Bohol.
Pinaagi sa usa ka privilege speech niadtong Martes, Mayo 11, 2021, atol sa regular session sa SP, gipadayag ni Board Member Jade Bautista ang kabalaka sa posibilidad nga mosaka pag-ayo ang presyo sa isda tungod sa giingong fish kill tungod sa Tilapia Lake Virus (TLV).
Gibutyag ni Bautista nga ang fish kill nahitabo sa lungsod sa Sevilla, Bilar ug Carmen. .
Sumala sa mga taho, ang TLV miigo usab niadtong 2017 sa mga lugar diin gibuhi ang tilapia sama sa Bulacan.
Ang isda nga tilapia maoy gilantaw nga alternatibong matang sa isda nga dali ra mapalit sa katawhan tungod kay kanunay igo ang supply niini ug dili tantong mahal ang presyo kung itandi sa ubang matang sa isda nga mapalit sa merkado.
Sumala sa usa ka taho, ang buhatan sa Bureau of Fisheries and Aquatic Resources (BFAR) sa Bohol miingon nga ang rehiyonal nga buhatan nanguha na ug mga sample sa mga tilapia nga namatay aron susihon kun unsa gayud ang hinungdan sa fish kill nga nahitabo sa mga naasoy nga mga lungsod sa Bohol.
Ang isyu sa giingong fish kill nga adunay kalambigitan ang mga tilapia, tukion kini sa Committeee on Agriculture sa SP nga gipanguluhan ni Board Member Ricky Masamayor alang sa tukmang aksyon ug imbestigasyon.