Sinulat ni Elvira Bongosia
Dili gyud unta wad-on ang appointment slips nga gihatag sa Philippine Statistics Authority (PSA) aron matiwas ang step 2 sa pagparehistro sa Philippine ID system (PhilSys), kini maoy gipadayag sa information officer sa ahensya nga si Emmanuel Galab.
Ang appointments slip usa ka pamaagi nga gisagop sa PSA aron dili maghan-ok ang tawo nga moparehistro subay sa social distancing nga polisiya batok sa Coronavirus disease (Covid).
Ang pagpatuman sa PhilSys gilantaw sa kagamhanan nga makahatag ngadto sa mga ubos ug kita nga banay sa posibilidad nga makabukas sila ug account sa bangko, diin ikapadagayday ang mga hinabang sa kagamhanan.
Una na nga gipasangil sa mga katawhan ang mga iregularidad sa pagpanghatag sa ayuda sa kagamhanan, ilabi na kun kini ipaagi sa mga pulitiko.
Kahinumduman nga subay niini, gihimo sa PSA ang step 1 o preregistration sa mga Pilipino sugod sa mga may ubos ang kita ngadto sa mga senior citizens ug mga persons with disability (PWD).
Dinhi sa Bohol, gibuksan sa PSA ang ikaduhang hugna sa pagpanghegistro ug kini mao na ang pagkuha sa kinahanglang nga digital information ug biometrics sa mga morehistro, pinaagi sa linawas nga pamaagi sa pagrehistro.
Hinuon, giseguro sa mga tigpasiugda sa mga step 2 registration centers sa kalungsuran nga ang ilang kalihukan nagsubay gayud sa minimum health standards batok sa Covid. Aron kini mapatuman ug walay mga tawo nga mapahimutang sa delikado nga kahimtang, gipanghatag sa PSA ang appointment slips diin nahimutang ang petsa, lugar ug oras alang sa ikaduhang ang-ang sa pagparehistro ug kini maglangkob sa pagkuha sa hulagway, pagkuha sa tamla sa kumagko ug nga tudlo sa kamot.
Kuhaon usab atol sa ikaduhang hugna sa registration diha sa mga kalungsuran ang iris scan, diin ang mata sa usa ka tawo, kuhaan ug ilhanan sa pagkatawo.
Hinuon, butyag ni Galab, sanglit ang PSA nagpadala sa ilang mga pahibaw sa mga morehistro sa ilang petsa, lugar sa pagparehistro sa ikaduhang hugna, pinaagi sa text, mahimo ra nga maoy ipakita alang ikaduhang rehistro.
Ang paagj nga gisagop sa PSA mao ang walay tawo nga gusto morehistro nga balibaran kun luag lamang ang schedule, apan matud ni Galab, tan-awon lamang usab sa moparehistro kun dili ba delikado kun daghan ang tawo nga tua didto sa lugar diin ipahigayun ang pagrehistro.
Gidugang ni Galab, nga hangtud karon, wala pa makabukas ang ilang online registration hubs.
Mao nga ang tambag sa PSA, subaya ang pahibaw nga ipadala sa PSA ngato kanimo sa imong cellphone aron makaseguro nga dili maghuwat ug taas nga panahon aron usab sila malangan ug ma-expose na hinuon sa Covid.