Sinulat ni Ven rebo Arigo sa Primer
Nagpasalamat si Gob. Arthur Yap sa Department of Trade and Industry (DTI), United States Agency for International Development (USAID), Department of Interior and Local Government (DILG) ug ubang institusyon sa ilang pag-ila sa Bohol isip labing competitive nga probinsiya sa Central Visayas ug ika-20 sa 81 ka mga lalawigan sa nasud, matud pa sa taho sa Provincial Information and Media Relations (PRIMER) office niadtong Martes, Mayo 11, 2021.
Usa sa mga kategoriya nga gigamit sa DTI sa pag-ila isip labing competive nga probinsya sa Central Visayas mao ang katakus sa usa ka lalawigan sa pagsugakud taliwa sa pandemya ug pagpatuman sa mga programa sa kaugmaran bisan sa padayong public health emergency sa nasud ug kalibutan.
Matud sa gobernador, wala unta ilha sa DTI ang Bohol kun luya pa ang pagdumala sa probinsiya, apil syudad ug kalungsoran.
Gipasalamatan usab ni Yap ang sektor sa patigayon nga naningkamot bisan sa ekonomikanhong kalisud dala sa Coronavirus disease (Covid), ubang ahensiya sa goberno, mga local government units (LGU) ug nagkalain-laing sektor sa sibil nga katilingban.
Ang pasidungog dili iya sa gobernador apan ngadto sa tanang Bol-anon, matud ni Yap.