Sinulat ni Elvira Bongosia
Hatagan sa Department of Education (DepEd) ang mga magtutudlo sa mga pampublikong tunghaan sa nasud ug tulo ka buwan kantidad sa internet load karong nagpadayon pa gihapon ang distance learning sa nasud tungod sa pandemya sa Coronavirus disease (Covid).
Matud pa sa pahayag nga gipagawas ni DepEd Undersecretary Alain Pascua, sa pagkakaron nipalit na ang ahensiya ug connectivity load nga adunay 30 hangtod 35 gigabytes (GB) nga kantidad sa data matag buwan alang sa mga magtutudlo sa pampubliko nga mga tunghaan.
Sugdan sa DepEd ang pagpanghatag sa maong internet load sa mga magtutudlo sa Hunyo 2021.
Si Pascua nagkanayon nga ang mga dili magamit nga data allocation i-rollover sa mga mosunod nga buwan sulod sa usa ka tuig hangtod padayon na nilang makonsumo ang tibuok 100GB nga data.
Gidugang usab niini nga gipaabot nilang daghan nang mahimo ang mga magtutudlo sa maong bandwidth nga ihatag ngadto kanila.
Ang DepEd naggahin ug P1.2 bilyon nga pondo alang niining programa.
Ang maong data load ang gihulip sa plano kaniadto sa DepEd nga mohatag ug P450 load allowance sa mga magtutudlo.
Pinasikad sa datos sa DepEd, adunay kapin sa 800,000 ka magtutudlo sa mga pampublikong tunghaan sa nasud.