Sinulat ni Dave Albarado
Mas gipahugtan karon sa Bohol Inter Agency Task Force (BIATF) kaabag ang mga focal person sa matag lungsod ug apil ang dakbayan sa Tagbilaran sa pagbantay batok sa mga tawo nga buot mosulod sa Bohol nga magdala ug pekeng resulta sa real time-polymerase chain reaction (RT-PCR) test.
Kini human sa 23 ka mga local government unit (LGU) sa Bohol mitaho nga nakasakop sila ug mga tawo nga nagdala ug peke nga mga RT-PCR test result sa ilang pagpauli dinhi sa Bohol.
Matod ni Dr. Anthony Damalerio, hepe sa Provincial Disaster Risk Reduction Management Office nga pinasikad sa nadawat nilang taho nga gipang tamper ang mga impormasyon sa RT-PCR result sama sa petsa sa test ug ngalan sa mga tawo nga mipaubos sa swab test.
Matod niya nga dunay 23 ka mga LGU ang mitaho nga nakasakop ug pekeng PCR test ug kini ang mga lungsod sa Tubigon, Ubay, Talibon, Batuan, Dauis, Cortes, Panglao, Buenavista, Tagbilaran City, Sikatuna, Carlos P. Garcia, Duero , Pilar, Sagbayan, Dagohoy, Balilihan, Jagna, Bilar, Bien Unido, Candijay, Valencia, Getafe, ug Inabanga.
Ang mga focal persons sa mga kalungsoran ug dinhi sa dakbayan gimandoan nga susihon pag-ayo ang mga dokumento nga ipresentar sa mga tawo nga mosulod sa Bohol aron dili na malutsan sa peke nga dokumento.
Gihulipan na ang commanding officer sa 47th Infantry Battalion (IB). Si Lt. Col. Allyson Depayso (wala) maoy bag-ong commanding officer sa 47th IB puli kang Lt. Col. Allan Tabudlo (tuo). Si Major General Eric Vinoya (tunga) maoy nangulo sa seremonyas sa pagpuli sa pangu sa 47th IB. Hulagway gikan sa 47th IB.