Sinulat ni Dave Albarado
Matud pa sa mga tinugyanan sa 47th Infantry Battalion (IB) nga ang namatay nga lider sa mga gikatahapan nga mga rebeldeng New People’s Army (NPA) sa Bohol maoy gitumbok nga giingong mastermind o nagpasiugda sa pagpamatay sa duha ka rebel returnees ug usa ka matud pa gealegar nga asset sa militar.
Giingon nga si Romeo Nabas nga apil sa napatay sa engkuwentro didto sa Bilar, maoy gitumbok sa militar sa Bohol nga maoy utok sa pagpatay sa pipila ka mga tawo nga giingong asset o espiya sa gobyerno didto sa lungsod sa Batuan.
Matod ni 1Lt. Elma Grace Remonde, ang Civil Military Operations Officer sa 47th IB nga si Romeo Nabas, 54 nga taga barangay Rizal, Batuan, ang posibleng ang utok sa sagunson nga pagpatay sa mga sibilyan lakip na ang pipila ka kanhi sakop sa walhong grupo nga NPA.
Lakip sa mga giingong biktima sa pagpatay nga gipaluyohan ni Romeo Nabas ang mga kanhi rebeldeng NPA nga gibanhigan didto sa barangay Aloha, Batuan.
Duha ka mga kanhi rebelde ang namatay human sa maong insidente nga pagpamanhig.
Gikataho nga si Rolando Pornis ug si Jaime Cagatin, napagan niadtong Abril 26, 2021 human giingong gibanhigan sa mga gikatahapang mga sakop sa NPA.
Sila gikan nagpahigayon ug lecture batok sa komunismo didto sa barangay Aloha, Batuan.
Si Romeo Nabas kinsa giingong nagsilbi nga vice commanding officer sa Sandatahang Yunit Propaganda (SYP) sa Bohol Party Committee sa NPA sa Bohol gitumbok usa nga maoy lider sa rebelde nga maoy mipatay kang Crisanto Nabas nga taga barangay Rizal, Batuan nga gipusil patay atubangan sa iyang 9 anyos nga anak.
Matud pa nga gipatay si Crisanto Nabas tungod kay gikatahapan kuno nga usa ka asset sa militar.
Kusganong gipanghimakak ni Remonde nga asset si Crisanto Nabas sa militar.