Sinulat ni Elvira Bongosia
Ikaduha na ang Pilipinas kun hisgutan ang vaccination rollout kun itandi sa nasud nga anaa sa Southeast Asia.
Kini human nisaka na sa 4,097,425 doses ang gipangapod-apod sa mga katawhan, matud pa sa National Task Force Against COVID-19 sa iyang labing ulahing taho.
Pinasikad sa datos nga gipagawas sa National Vaccination Operations Center (NVOC) niadtong Mayo 23, anaa sa 4,097,425 kinatibuk-ang doses sa bakuna ang nahatag sa publiko sa Pilipinas samtang nanguna ang Indonesia diin ang maong nasud miapod-apod sa 24,723,728 ka mga doses.
Naapsan na usab sa Pilipinas ang Cambodia (3,673,639) nga anaa sa ikatulo nga pwesto ug ang Singapore (3,407,068) nga naa sa ikaupat nga puwesto na lamang samtang naa sa ikalima ang Myanmar (2,994,900).
Anaa sa ika-13 nga puwesto ang Pilipinas sa 47 ka nasud sa Asya ug ika-37 gikan sa 196 ka nasud sa tibuok kalibotan.
Kapin sa 4 ka milyong Pilipino na usab ang nabakunahan sa tibuok nasod, diin 949,939 ka mga tawo ang hingpit nga nabakunahan, samtang 3,147,486 ang nakadawat na sa ilang unang dose.
Sa usa ka pahayag, nagtuo si vaccine czar Kalihim Carlito Galvez Jr. nga madoble nila ang gidaghanon sa mga mabakunahan sa Hunyo 2021 sa pagsugod sa pagbakuna sa mga ‘economic frontliners’ ug ‘indigenous population’ basta padayon lang ang pag-abot sa mga bakuna sa nasud.
Gawas niini, posible usab nga makab-ot na ang herd immunity sa nasud sa dili pa mahuman ang tuig.
