Sinulat ni Dave Albarado
Natupukan na ug bakuna batok sa Coronavirus disease (Covid) si Gob. Arthur Yap niadtong adlaw nga Huwebes, Hunyo 3, 2021.
Ang gitupok nga bakuna ngadto sa gobernador mao ang hinimo sa Sinovac nga gikan sa China.
“[Niadtong buntag sa Huwebes] nagpabakuna ko ug Sinovac isip pagpakita ug suporta alang sa atong padayong pagbakuna sa katawhan batok sa COVID-19. Dili kita angay nga mahadlok nga magpabakuna tungod kay dugang kini nga proteksyon sa atong kaugalingon batok sa COVID-19,” matud pa ni Yap.
Si Ron Zapatos, usa ka nurse sa Gov. Celestino Gallares Memorial Hospital (GCGMH) maoy mitupok sa gobernador didto sa Bohol Provincial Diagnostic and Ambulatory Care Center nga naila kaniadto sa pangalan nga Bohol Medical Care Institute nga nahimutang sa barangay Dao ning dakbayan sa Tagbilaran.
Ang pagtubok sa bakuna ngadto sa gobernador sinaksihan nila ni Provincial Health Office (PHO) officer-in-charge (OIC) Cesar Tomas Lopez ug sa chief of staff sa gobernador nga si Giselle Quimpo ug uban pang taga kapitolyo.
Ang pagpabakuna ni Yap nahimo tungod kay sa labing ulahing kamanduan, gitugutan na ang mga mayor ug gobernador nga matupukan ug bakuna sa Inter Agency Task Force (IATF).
Matud pa ni Lopez, ang ikaduhang skedyul sa bakuna ni Yap gitakda karong Hulyo 2, 2021.
