Sinulat ni Elvira Bongosia
Gimando ni Presidente Rodrigo Duterte ang patas nga distribusyon sa nagkalain-laing matang (brand) sa coronavirus vaccines sa nagkalain-laing dapit sa nasud.
Sa pakighinabi ni Duterte sa publiko niadtong Mayo 26, 2021, gitumbok niini nga dili angay magpili karon ang katawhan sa kung unsa ang brand sa bakuna ang itupok kanila ilabi na nga limitado lang ang suplay sa nasud.
Kini human nadismaya ang presidente sa pagpili sa kadaghanan sa mga Pilipino diin may pipila pa nga nag-ingon nga magpabakuna lang sila kung Pfizer ang itupok kanila.
“I cannot administer exclusive Pfizer sa isang lugar to the exclusion of other Filipinos. Kaya hindi puwede ho ‘yang ano — eh kailangan talaga i-mix ‘yan at saka ‘yong blind ang tao sa anong binibigay. Basta may bakuna. Period. And the best bakuna is really the one that’s available for you,” matud pa ni Duterte.
Samtang nagpabilin si Duterte sa iyang posisyon nga kinahanglan nga adunay “fair and equitable access” sa mga bakuna nga makab-ot sa katawhan sa nasud.
Matud pa niini nga ang mga bakunang nahatagan ug emergency use approval (EUA) sa nasud napamatud-ang luwas ug epektibo sa clinical trials.
“There must be equality in everything. Kung sana maraming Pfizer tapos hindi maibigay sa inyo, then you have every reason to complain. But if it is a limited number tapos gusto ninyo sa inyo lang, hindi puwede ‘yan. So ang order ko is to mix,” pahayag pa sa pangulo.
“Kung ayaw ninyo, huwag. Ayaw ninyo ng ibang — Sinovac and other — hindi namin problema ‘yan,” dugang pa sa pangulo.
Ug tungod kay nanggawas ang mga bag-ong coronavirus variants, miingon si Duterte nga maayo nga magpabakuna na ang tanan ug dili na mupili pa sa bakunang itupok kanila.