Mga tinun-an sa Tugas Elementary School didto sa islang lungsod sa Pres. Carlos P. Garcia nakadawat gikan sa Kapitolyo ug mga bag-ong school bags, preskong gatas ug pan de sal. Gidawat sa mga bata ang mga gasa niadtong Lunes, Hunyo 7, 2021. Hulagway gikan sa Primer.
Board exam hayan madayon sa Bohol ning tuiga ug kini gikalipay ni Gob. Yap
Sinulat ni Ven rebo Arigo
Posibleng adunay board examination alang sa gustong hingpit nga mahimongmaestra ug criminologist sa Bohol ning tuiga ug gipasalig ni Gob. Arthur Yap ang unsa mang tabang iyang ihatag aron nga madayon kini.
Ang posibilidad nga himoon ang pasulit gitaho ni Professional Regulation Commission (PRC) Regional director Narcival Randie Taquiqui ug gikalipay kaayo sa gobernador, matud sa taho sa Provincial Information and Media Relations (PRIMER).
Nibisita kang Yap si Taquiqui uban kang PRC-7 Chief Administrative Officer Gerdel Bordadora sa Kapitolyo niadtong adlaw nga Lunes, Hunyo 7, 2021.
Suportado ni Yap ang national licensure examination nga himoon dinhi sa Bohol kay dako kining tabang sa hapit 3,000 ka mga teacher examinees sa Bohol ug 3,000 ka mga criminologist examinees sa rehiyon nga naglisod
ug kuha sa maong pasulit taliwa sa pandemya.
Ang pagsugod ray kuwang ug kini gilaumang masundan sa mga board examination sa ubang kurso, dugang sa samang taho.
Determinado ang Kapitolyo nga makig-alayon sa PRC aron masiguro nga adunay mga testing venue ug watcher alang sa mga eksiminasyon.
Gihisgotan usab sa gobernador ug kadagkuan sa PRC ang pagdugang sa serbisyo sa PRC Satellite Center sa Bohol nga gibuksan sayo ning tuig nga anaa sa daan nga Kapitolyo.
Ang pagbutang ug PRC center ug pagpahigayon ug board examination sa Bohol gipaningkamotan ug suportado usab ni Cong. Edgar Chatto sukad sa niadtong panahon nga gobernador pa siya ug sa Sangguniang Panlalawigan nga ubos karon ni Bise Gob. Rene Relampagos.
Nitambong usab sa maong tigom sa gobernador ug opisyales sa PRC ang hepe sa Capitol Education Development Center nga si Ginaluz Dano, dugang nga asoy sa taho sa PRIMER.