Sinulat ni Ven rebo Arigo
Ang programa ni Gob. Arthur Yap maoy gihimong modelo ni Department of Agriculture (DA) Sec. William Dar alang sa Province-led Agriculture and Fisheries Extension Systems (PAFES) sa mga lalawigan sa nasud, matud sa taho sa Provincial Information and Media Relations (PRIMER).
Sa iyang memorandum niadtong Lunes, Hunyo 7, 2021, gimandoan sa kalihim ang tanan niyang rehiyonal direktor sa pagsunod o paghimong sumbanan sa gitawag niyag “Bohol model” sa pagpatuman sa PAFES.
Ang PAFES usa sa mga nag-unang pamaagi sa DA ubos sa “OneDA Reform Agenda” nga gitumong sa pagsibo sa lokal ug nasyonal nga mga prayoridad nga plano ug programa sa agrikultura ug pangisda.
Pasiuna nga gipatuman sa DA ang PAFES sa usa lang ka pilot province sa matag rehiyon o 16 ka mga probinsiya tibuok nasud.
Ang Negros Oriental mao ra untay lalawigan sa Central Visayas o Rehiyon 7 diin kasamtangang gisuwayag ipatuman sa DA ang programa sa PAFES.
Apan kalit nga nihukom ang kalihim sa agrikultura sa pag-apil sa Bohol human niya nakita ang presentasyon ni Yap sa mga programa ug proyekto sa probinsiya niadtong Biyernes, Hunyo 4, 2021.
Kini atol sa pagbisita ni Dar sa Kapitolyo aron pangunahan ang pagtugyan ngadto sa gobernador sa mga makinarya, proyekto ug ayuda sa panguma ug pangisda nga nikabat ug P387 milyones.
Niadtong Lunes o tulo ka adlaw human sa iyang pagbisita, gipagawas ni Dar ang memorandum sa paghimo sa programa sa Bohol nga modelo sa pagpatuman sa PAFES sa nasud.
Matud sa kalihim, ang mga programa sa Bohol nga gipakita ni Yap usa sa labing maayo nga iyang nakita.
Kini mitukma sa national reform agenda sa DA ug mga estratehiya sa departamento bisag wala pa gani maapil ang Bohol sa PAFES.
Giila usab ang suporta ni Bise Gob. Rene Relampagos, sa Sangguniang Panlalawigan, Office of the Provincial Agriculturist, Office of the Provincial Veterinarian ug uban pang buhatan—ingon man ang kanunayng pag-alayon ni Cong. Edgar Chatto—sa kaayohan sa lalawigan.