Sinulat ni Ven rebo Arigo
Gidasig ni Gob. Arthur Yap ang mga Bol-anon sa pagpamakuna kay mao kini gitoohan sa mga doktor ug ubang eksperto nga epektibong pamaagi nga makasanta sa pagkuyanap sa Coronavirus disease (Covid).
Magpadayon ang paspas nga pagbakuna sa Bohol kutob sa bakuna nga moabot ug bisan kon mag-agad gihapon kini sa gidaghanon sa bakuna nga ihatag sa gobernong nasyonal.
Adunay dakong pondo ang probinsiya aron ipalit ug bakuna apan wa pa magamit kay ang nasudnong kagamhanan maoy nagbuot sa suplay ug distribusyon sa pagkakaron.
Ang matag supply sa bakuna nga moabot gikan sa Inter Agency Task Force (IATF) ug Department of Health (DOH) itupok dayon sa tulo ka mga priority groups nga mao ang—A1 (medical frontliners), A2 (senior citizens) ug A3 (persons with co-morbidities).
Hangtud sa Hunyo 11, 2021, nikabat tanan ug 230,721 ka mga indibidwal ang nalista ug naapil sa maong mga kategoriya — 42,949 sa A1, 155,845 sa A2, ug 31,927 sa A3.
Ang A1 priority group mao ang medical ug health frontline workers, ingon man barangay health workers ug bisan tanod nga nadestino sa pasilidad sa kuwarentina, matud ni Dr. Cesar Tomas Lopez, officer in charge sa Provincial Health Office (PHO) ug tigpamaba sa Bohol Inter-Agency Task Force (BIATF).
Sa 42,949 sa target A1 priority group, 68.1% na ang nabakunahan (vaccinated) ug 48.3% ang hingpit nang bakunado sumala sa vaccination report sa PHO hangtud sa Hunyo 11 ning tuiga.
Fully immunized o kumpletong nabakunahan ang tawo kon kaduha siya tupoki. Ang ikaduhang tupok himoon pipila ka semana human sa una.
Sa 155,845 ka mga tawo nga anaa sa target A2 priority group, 10% ang nabakunahan usa unang dose, ang A2 category gilangkub sa mga senior citizen.
Sa 31,927 nga nasakop sa A3 target priority group, 7% ang nakadawat na sa pasiunang tupok.
Ang kategoriyang A3 gilangkub sa mga nag-edad ug 18 hangtud 59 nga adunay comorbidity o aduna daay laing balatian o gipangbati.
Ang pagbakuna sa ubang sektor mag-agad sa supply sa bakunang moabot gikan sa IATF ug DOH kay gani limitado pa ang ipada dinhi alang lamang sa mga nag-unang priority groups.
Miabot na ang 5,000 ka mga doses sa Sputnik V nga ginama sa Russia ug ang 11,700 ka mga doses sa bakuna nga hinimo sa Pfizer niadtong adlaw nga Miyerkules, Hunyo 16, 2021.