Sinulat ni Dave Albarado
Mihangyo si Sen. Richard Gordon ngadto sa Inter Agency Task Force (IATF) pinaagi sa Philippine Overseas Employment Administration (POEA), nga tan-awon ug balik ang gipagawas nga advisory sa POEA kabahin sa pagsuspenso sa pagpadala ug mga nurses nga bag-o lang nga gi-hire sa gawas sa nasud.
Kini ang hangyo ni Gordon pinaagi sa usa ka sulat nga pinetsahan ug Hunyo 16, 2021, nga iyang gipadala ngadto sa chief implementer sa IATF nga si Sec. Carlito Galvez. Ang sulat ni Gordon naghangyo nga tugutan ang mga nurses nga manarbaho sa gawas sa naaud. Partikular nga gitumbok ni Gordon ang kahimtang sa pito ka mga nurses nga gusto unta manarbaho sa nasud sa Qatar.
Sa iyang sulat, mihangyo si Gordon nga bakwi-on sa IATF ang maon mga sumbahanan, pinaagi sa POEA aron manarbaho ug hapsay ang mga nurses didto sa Qatar ug makatabang sa ilang pamilya dinhi sa Pilipinas.
Matud ni Gordon nga gikinahanglan pag-ayo ang serbisyo sa mga nurses sa Qatar ilabi na nga ang maong nasud maoy lugar diin pagahimoon ang Fifa World Cup sa sunod tuig.
Kinahanglan ang mga nurses didto karon palang aron ipailawom sila sa pagbansay-bansay kay sila man ang ibutang isip mga medical support alang sa maong kalihokan. Gipalabang usab ni Gordon nga aduna may nga mukuha ug pasulit aron mahimong hingpit nga nurse karon sunod bulan ug sila ang mga mopuli sa mga nurses nga gusto nga manarbaho didto sa laing nasud.
Gipunto usab ni Gordon nga ang pagpugong sa mga nurses nga Pilipino nga manarbaho sa gawas sa nasud naghatod ug dakong kadaot sa ekonomiya sa nasud, diin natala ang employment rate sa 8.7% tungod sa epekto sa mga lockdown nga gihimo aron mapugnan ang pagkuyanap sa sakit nga Coronavirus disease (Covid).
Giundang sa POEA ang pag-isyu ug mga Overseas Employment Certificates (OEC) human niabot na sa 5,000 ka mga nurses ang migawas sa nasud pinasikad sa datos nga gipagawas niadtong Hunyo 2, 2021.
Matud sa advisory sa POEA, dili na tugutan nga mugawas sa Pilipinas ang mga nurses lakip na ang mga nursing aides.