Sinulat ni Dave Albarado
Mimando si Presidente Duterte nga ipang apod-apod dayon ang mga bakuna sa mga high-risk nga dapit sa Pilipinas, matud pa ni Senador Christopher “Bong” Go.
Gitahasan sa president niadtong Hunyo 13, 2021 ang Inter Agency Task Force (IATF) sa dinaliang pag apod-apod sa mga bakuna sa dapit diin daghan ang mga natala nga kaso sa nasud.
Miingon si Go nga iyang nakahinabi ang presidente ug gisugo sa ulahi nga ihatod dayon ang mga bakuna sa mga lugar diin nagkasaka ang mga kaso sa Covid sama sa Zamboanga del Norte ug Zamboanga del Sur.
Gitumbok ni Go nga nagkaubos ang mga kaso sa Metro Manila tungod kay mas daghang mga tawo ang natupokan ug bakuna sa maong dapit.
Nakita sa presidente nga ang dinalian nga pagpadala sa bakuna maoy makaingon nga mu-stabilize ang mga ihap sa kaso sa Covid.
Tungod niini, gipadali sa presidente, matud ni Go ang pagapod apod sa bakuna sa mga dapit sama sa Visayas ug Mindanao aron mapugngan ang gikahadlokan nga posibleng mahugno ang healthcare system kay daghang kaso na sa Covid ang giatiman sa mga health frontliners sa nagkadaiyang health facilities.
Nunot niini, subling mipahimangno ang presidente sa katawhan nga mutamod gihapon sa mga sumbanan sa kaluwasan ug kasanihan aron makalikay nga matakdan ug Covid.
Sa makausa pa, gisulti ni Sen. Go nga angay kompletohon sa mga katawhan ang duha ka doses sa bakuna aron makabaton ug hingpit nga panalipod batok sa makalilisang nga sakit nga Covid.
