Sinulat ni Dave Albarado
Walay laraw si Gob. Arthur Yap nga magpagawas ug bag-ong executive order (EO) aron mapugngan ang nagkasaka nga ihap sa mga kaso sa Coronavirus disease (Covid) sa Bohol, matud pa ni Provincial Administrator Kathyrin Pioquinto niadtong adlaw nga Miyerkules, Hunyo 16, 2021.
Matud pa ni Pioquinto nga nasabutan sa mga mayor ug mga hepe sa Rural Health Units (RHU) sa kalungsuran nga napahimutang na ang tanang sumbanan alang sa pagpugong sa pagkuyanap sa sakit ug dili na kinahanglan ang lain pa nga EO.
Nunot niini, giingnan ang mga sakop sa security cluster sa Bohol Inter Agency Task Force (BIATF) nga gipanguluhan sa mga tinugyanan sa Philippine National Police nga ipatuman gayud ang mga sumbanan ilabi na nga milugak ang pagpatuman sa mga hilit nga lugar, matud pa ni Pioquinto.
Nakita sa mga sakop sa medical cluster sa BIATF nga daghan sa mga katawhan sa Bohol ang wala nagsunod sa lagda sa pagsul-ob ug face mask, face shields ug pagsunod sa social distancing, dugang nga asoy ni Pioquinto.
Tungod sa wala pagsunod sa mga lagda nakita ang pagdaghan sa mga kaso sa Covid sa lalawigan ug kasagaran sa mga kaso kay mga local transmission, asoy sa datos sa BIATF.
Nakadawat usab ug taho ang BIATF, matud ni Pioquinto nga adunay pampubliko nga mga sakyanan nga wala magsunod sa lagda nga 30 porsyento lamang sa kapasidad sa sakyanan ang tugutan nga makabyahe.
Midugang ang taho pag-ingon nga adunay mga sakyanan sa publiko nga puno kaayo ug maningil kuno ug doble nga pletehan nga kalapasan sa mga lagda nga gipatuman sa Department of Transportation (DOTr).