Sinulat ni Dave Albarado
Gipadayag ni Lila mayor Arturo Jed Piollo nga dili angayang pugson ang mga tawo nga magpabakuna batok sa Coronavirus disease (Covid).
Kini gipadayag ni Piollo kinsa usa usab ka abogado isip reaksyon sa pamahayag ni Presidente Rodrigo Duterte nga ipadakop ang mga tawo nga magdumili ug magpabakuna.
Matod ni Piollo atol sa interview sa programa sa Open Forum, nga gidumala ni Ardy Araneta-Batoy ug Dave Albarado niadtong Hunyo 24, 2021 nga walay balaod nga gipanday sa Kongreso nga nagpahamtang ug silot sa mga magdumili sa pagpamakuna.
Dugang pa ni Piollo nga kini usa ka kalapasan sa katungod konstitusyonal sa mga tawo nga muukom nga dili magpatupok ug bakuna.
Hinuon matod ni Piollo nga angay dasigon ang katawhan nga magpabakuna kay mao ra kini ang klarong sulbad sa Covid pandemic.
Nagtuo si Piollo nga komedya lang ang pamahayag sa presidente nga ipadakop ang dili magpabakuna.
Hinuon giklaro ni Piollo nga ang mga makalapas sa health protocol maoy angayang dakpon gumikan kay duna may balaod nga napanday nga naglatid sa silot alang sa mga malapason.