Sinulat ni Dave Albarado
Giawhag ni Sen. Christopher “Bong” Go pag-usab ang mga Pilipino nga magpabakuna ilabi na kadtong anaa na sa mga priority list, aron mapanalipdan sila batok sa Coronavirus disease (Covid).
Iyang giusab ang awhag ni Presidente Duterte kinsa miingon nga pang hingusgan sa kagamhanan ang awhag niini sa mga Pilipino nga magpbakuna ilabi nga muabot dinhi ang labing daghan nga mga ‘supply’ sa bakuna sa mga musunod nga adlaw.
Matud sa senador nga kun madugangan ang mga Pilipino nga mabakunahan posible nga hinay-hinay nga ilibkas ang mga ‘restrictions’ sama sa mga pugos nga pagsul-ob ug face mask ug face shield ug mga curfew ilabi na sa mga senior citizens o mga batan-on.
Bisan tuod lisod ang ang pagkuha sa mga supply sa bakuna, miingon si Go nga gihimo sa kagamhanan ang tanan aron adunay igo nga ‘supply’ sa bakuna ang nasud alang sa mga Pilipinong nagkinahanglan niini.
Mokabat sa 14.2 million ka mga bakuna ang nahidangat dinhi sa nasud , sumala pa ni Go.
Dugang pa niya nga upat ka milyon ka mga doses ang gikatakda nga muabot sa Pilipinas karong bulana. Ug ang target, makakuha ug kinatibuk-an nga supply nga 149 million ka mga doses aron makab-ot ang gitawag nga herd immunity.Sa laing bahin, kon hisgotan ang gidaghanon sa supply sa bakuna, ang Pilipinas ang ikaduha sa mga nasud nga adunay labing daghan ang supply sa bakuna sa tibook Southeast Asia, matud ni Go ug gipaabot nga madungangan pa ang supply sa bakuna sa mga musunod nga mga adlaw gikan sa Covax facility sa World Health Organization (WHO).