Ang Tawag 

ni Padre Jose joesum Sumampong, Jr.

Ang Ika-14 nga Domingo sa Tuig (A)

Hulyo 4, 2021

EBANGHELYO (Mt 11:25-30)

²⁵ Unya si Jesus miingon, “O Amahan, Ginoo sa langit ug sa yuta! Nagpasalamat ako kanimo kay gipadayag mo man ngadto sa mga walay kahibalo ang imong gililong sa mga maalamon ug sa mga makinaadmanon. ²⁶Oo, Amahan, natuman kini kay mao may imong gusto ug pagbuot.”

²⁷“Ang akong Amahan naghatag kanako sa tanang butang. Walay nakaila sa Anak gawas sa Amahan, ug walay nakaila sa Amahan gawas sa Anak ug kadtong mga tawo nga buot sa Anak nga makaila sa Amahan.”

²⁸“Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo.”

²⁹“Isangon ang akong yugo ug sunda ninyo ako, kay malumo ako ug mapaubsanon sa espiritu, ug makapahulay kamo. ³⁰Sayon ang yugo nga akong ihatag kaninyo, ug gaan ang ipapas-an ko kaninyo.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 11: 25-30)

^25a Unya si Jesus miingon… 

Diha sa Leksyonaryo ang pagbasa sa Ebanghelyo kasagaran magsugod og “Si Jesus miingon…” Kana aron mahimong masayon ang pagbasa niini. Apan lahi ang linya nga “Unya si Jesus miingon”. niining bahina sa Ebanghelyo tungod kay anaa mabasa gayod kini sa orihinal nga teksto ni San Mateo. Ngano kaha?

Kining linyaha “Unya si Jesus miingon” naghulagway sa panghitabo nga daw drama. Si Jesus nagpuyo nga gisungog sa daghang mga kabalaka ug kaparotan. Si Juan nga Magbubunyag nga niadtong tungora nabilanggo daw nagduhaduha mahitungod kang Jesus. Nagpadala siya sa pipila sa iyang mga tinun-an aron sa pagpangutana kang Jesus: “Sultihi kami, ikaw ba ang giingon ni Juan nga moanhi, o magpaabot pa ba kamig lain?” (Mt. 11:3). Pun-an pa gayod sa mga pagdumili sa pagdawat sa mga tawo ni Jesus (tan-awa sa Mt. 11:16-19). Ug unya si Jesus mikondinar sa mga dakbayan nga haduol sa lanaw sa Tiberias kay nagmagahi sila sa pagdawat kaniya ug sa iyang mensahe.

Kon kita pa tingali ang anaa sa  nahimutangan ni Jesus tingali og magsubo ug madiskorahe kita. Apan dili kana mao ang gipakita ni Jesus. Usa ka himno sa Kalipay ang milugwa gikan sa mga ngabil ni Jesus.  Unsa man ang iyang sekreto?

^25b “O Amahan, Ginoo sa langit ug sa yuta! …

Sulod niining hamubong saysay kalima ka higayon nga atong madungog nga si Jesus mitawag sa Dios og Amahan.

Sa wala pa si Jesus, dili nato mabasa sa Bibliya, diha sa Daang Tugon, nga ang Dios gitawag og “Amahan”. Si Jesus mao ang labing una nga mitawag sa Dios ginamit ang pulong “Abba” nga maoy gamiton sa mga gagmayng bata diha sa pagtahod o pagtawag sa ilang mga amahan. Sama kini sa atong “Tatay” o “Papa” o “Daddy”.

^25c … Nagpasalamat ako kanimo…

Ang pulong sa Griego nga gigamit mao ang “exomologeisthai” nga nagkahulogan og “pag-angkon”, “pagkompisal sa publiko”, “pagsaulog”, “pagdayeg”, “pagpasalamat”.

Si Jesus, bisan pa kon sa iyang pagwali daw dili siya nagmalampuson, apan nagpabilin ang iyang kasingkasing nga puno sa pag-ampo sa  pagdayeg (prayer of praise). Mao kini ang Eyukaristiya!

Nabatunan ko ba kining paglitok sa pag-ampo sa pagdayeg sa Dios bisan pa kon anaa ako nagapos sa mga kasakit ug kalisod?

^25d … kay gipadayag mo man ngadto sa mga walay kahibalo ang imong gililong sa mga maalamon ug sa mga makinaadmanon. 

Ang sukaranan sa pag-ampo ni Jesus mao ang iyang kasinatian. Ang pagsalikway kaniya sa mga eskriba ug sa mga Magtutudlo sa Balaod ug ang pagsagop kaniya sa mga anaa sa ubos ug sa kabos, alang kang Jesus maoy dakong kahigayonan sa pag-ampo. 

Nahimo bang kabahin sa akong pag-ampo ang mga nagkaguliyang nga mga panghitabo sa akong kinabuhi? Ako bang gipasalamatan ang Amahan bisan pa sa akong mga kapakyasan?

²⁶Oo, Amahan, natuman kini kay mao may imong gusto ug pagbuot.”

Dinhi natino ni Jesus ang espesyal nga luna sa Amahan alang sa kabus ug anaa sa labing ubos. Nahimo usab kini nga makanunayong pagbati ni Jesus. Alang sa mga makasasala, mga sinalikway, mga walay nahot, ang Amahan ni Jesus nagpangita kanilang tanan uban sa espesyal nga gugma!

Pinaagi sa GSK/BECs nagpangita ba ako sa akong mga silingan nga anaa sa kawad-on o kalisod? 

²⁷ Ang akong Amahan naghatag kanako sa tanang butang. Walay nakaila sa Anak gawas sa Amahan, ug walay nakaila sa Amahan gawas sa Anak ug kadtong mga tawo nga buot sa Anak nga makaila sa Amahan.”

Bisan pa kon natingban si Jesus sa tanang butang kay kini gihatag man kaniya sa iyang Amahan, apan wala gayod magmakuli si Jesus sa pagsagop sa kahimtang nga kabos.

Dinhi nagagikan ang hilabihang kasuod tali sa Amahan ug sa Anak. Tungod kay sa pagka-kabos ni Jesus, ang iyang kinatibuk-an nga kinabuhi iya mang hingpit nga gipiyal ngadto sa iyang Makagagahum nga Amahan.

Dinhi usab masabtan nato ngano nga si Jesus misagop sa unsay iya sa tawo, gawas sa sala: sa iyang pagkaon ug pag-inum, sa iyang pagkatawa ug paghilak, sa iyang kagutom ug kauhaw, sa iyang pagkasuko—kay dinhi iyang gipadayag kon kinsa ug unsa ang Dios nga iyang gitawag og Amahan.

Pagpadayag! Mahibaw-an lamang nato ang Amahan pinaagi sa unsay gipadayag ni Jesus nga iyang Anak! Ug ang dapit nga ato siyang mahibaloan mao lamang gayod ang atong kasingkasing.

²⁸“Umari kamo kanako, kamong tanan nga gikapuyan ug gibug-atan sa inyong gipas-an, ug papahulayon ko kamo.” ²⁹ “Isangon ang akong yugo ug sunda ninyo ako, kay malumo ako ug mapaubsanon sa espiritu, ug makapahulay kamo. ³⁰ Sayon ang yugo nga akong ihatag kaninyo, ug gaan ang ipapas-an ko kaninyo.”    

Si Jesus nag-agda kanato. Dili malisod ang pagtubag niini. Mipasidaan nang daan ang mga propeta nga moabot ang panahon nga ang Dios dili na magsulat sa Balaod sa tableya nga bato kondili diha gayod mismo dulod sa kasingkasing sa mga tawo (Jer. 32:31-34).