Sinulat ni Dave Albarado
Misalmot isip usa sa mga ‘panelists’ si Gob. Arthur Yap nisdtong adlaw Miyerkules, Hunyo 30, 2021, atol sa ika-8 nga parte sa giingon nga “Kapihan Sa New York” Online Talk ubos sa temang “Las Playas Filipinas (The Beaches in the Philippines)” nga gi-organisa sa Fil-Am Press Club Of New York (FAPCNY), Philippine Department of Tourism – New York, Philippine Airlines ug Orientours Co., Ltd, sumala sa taho gikan sa Provincial Information and Media Relations (PRIMER).
Sa iyang presentasyon, mipa-ambit ang gobernador kabahin sa sitwasyon sa atong lalawigang Bol-anon- mga lakang nga gibuhat sa Kagamhanang Probinsyal taliwala sa pandemya sama sa pagkontrol sa mga kaso sa Coronavirus diseaee (Covid), pagsiguro sa pagkaon, paghatag ug serbisyo sa katawhan kada-baranggay ug ang kahimtang sa sektor sa turismo diin inanay nga gi-ablihan pinaagi sa travel bubbles aron mahaw-as ang ekonomiya sa probinsya, matud sa taho.
Kauban usab niya isip ‘panelist’ sila Gob. Francis ‘Chiz’ Escudero (Sorsogon), Gob. Hermilando ‘Dodo’ Mandanas (Batangas) ug Gob. Reynolds Michael Tan (Samar) diin mi-presentar usab sa ilang tagsa-tagsang taho kabahin sa sitwasyon sa turismo sa ilang probinsya.
Mitungha sa maong pakighinabi sila Consul General Elmer Cato (Philippine Consulate in New York), Joseph Opulencia, President, Orientors Ltd., Josh Vasquez, Area Manager sa Philippine Airlines, ug mga opisyales sa FAPCNY, dugang nga asoy sa taho.