Sinulat ni Dave Albarado
Mitambong si Gob. Art Yap niadtong Martes, Hunyo 29, 2021 sa Regional Peace and Order Council (RPOC) virtual meeting diin gitaho ang sitwasyon sa kahusay ug kalinaw sa rehiyon ug giawhag sa gobernador ang mga tunugyanan sa mga pulis nga paningkamutan ug pagayo ang pagsulbad sa terrorismo nga gipasiugdaan sa mga Communist Terrorist Groups (CTG), sumala sa taho sa Provincial Information and Media Relations (PRIMER).
Kabahin sa pagsupil sa terorismo ug ‘insurgency’, mihangyo si Gob. Yap mga kadagkuan sa Regional Police Office 7 nga kinahanglang mas palig-onon ug pakusgon ang mga pagpaningkamot sa pagtubag ining problema pinaagi sa suporta sa medical, dental ug uban pang social services nga mga panginahanglan para sa katawhan.
Dugang ni Yap, makatabang usab ang dugang nga tawo ug awtoridad aron mu-pulis sa kalinaw ug kahapsay sa mga barangay nga adunay hulga gikan sa mga bandidong buhat.
Miingon ang taho sa PRIMER nga langkob sa maong panaghisgut ang pagtaho sa sitwasyon sa kahusay ug kalinaw, sitwasyon kabahin sa drugas, terrorismo, sa pagpamakuna batok sa Coronavirus disease, ang estado sa Retooled Community Support Program (RCSP)x
Lain pang gihisgutan mao ang programa sa Barangay Development Program (BDP), ug ang mga leveling sessions kabahin sa National Task Force-Ending Local Communist Armed Conflict (NTF-ELCAC).
Mitambong usab sa maong virtual meeting ang mga kadagkuan sa Region 7 Police Office, mga gobernador sa mga probinsya ug mga mayor sa dagkong syudad sa rehiyon, mga opisyales gikan sa Department of Health (DOH) Region 7 ug mga kadagkuan sa lain-laing buhatan ug ahensya nga adunay papel sa pagpadayon sa kalinaw ug kahapsay sa katibuk-ang rehiyon sa Central Visayas, sumala sa taho sa PRIMER.