Sinulat ni Dave Albarado
Ang pagdakop sa kagawad sa Trinidad ug pastor sa Mabini, usa ka lehitimong lakang matod sa hepe sa Criminal Investigation and Detection Group (CIDG)-7.
Ang hepe sa CIDG-7 nga si Police Colonel Ireneo Dalogdog mihingusog nga lehitimong operasyon ang pagkasikop nila ni kang Barangay Councilor Carmilo Tabada sa Barangay Poblacion sa Trinidad Bohol ug ni Pastor Nathaniel Vallente tungod kay aduna silay bitbit nga search warrant gikan sa korte ug aduna usab kini presensya sa mga saksi.
Matod pa ni Dalogdog nga usa ka regular police operationsbang gihimo batok kang Tabada nga pinasikad sa ilang impormasyon maoy giingong pangulo sa Tabada criminal gang ug ang kauban niini nga pastor nga si Nathaniel Vallente nga giingong supporter sa kalihokan sa mga rebeldeng New People’s Army (NPA) dinhi sa Bohol.
Dugang ni Dalogdog nga dunay gihimong surveillance ug validation sa mga impormasyong ilang nadawat bahin sa duha ka suspetsado sa dili pa gihimo ang mga ronda.
Sa dihang positibo ang mga impormasyon milukat sila ug search warrant nga giluwatan sa mga huwes sa Talibon ug Tagbilaran City.
Nagkanayon si Dalogdog nga wala siya matingala sa mga pasangil batok kanila nga ‘planted’ ang mga ebidensiyang nasakmit gikan kang Tabada.
Una niini, gitumbok sa kabanay ni Tabada ingon man sa grupong Hugpong sa Maguumang Bol-anon-KIlusang Magbubukid ng Pilipinas (HUMABOL-KMP) nga planted ang mga nga nakuha sa mga kapulisan gikan sa duha atol sa managlaing
ronda niadtong Hunyo 25, 2021.
Sa usa ka pamahayag, ang HUMABOL-KMP mipasangil nga ang pagkasikop kang Tabada ug Vallente illegal ug ang mga ebidensya batok kanila gigama-gama sa mga otoridas nga naila usab sa pagpatay sa mga sibilyan nga karon gisugdan ang imbestigasyon ni International Criminal Court prosecutor Fatou Bensouda.
Dugang sa HUMABOL-KMP nga si Tabada dili makahimonnga magtago ug armas tungod kay ang balay ni Tabada duol ra kaayo sa estasyonan sa kapulisan ug sa munisipyo sa Trinidad. Gidugang nila nga ang balay ni Vallente duol ra sa national highway sa barangay San Jose, Mabini.
Si Tabada usa ka konsehal sa barangay ug coordinator sa Farmers’ Development Center (FARDEC) ug si Vallente usa ka pastor sa United Churches of Christ in the Philippines (UCCP).
Dugang pa sa HUMANOL-KMP ang duga mga madasigong tigpanalipod sa katungod sa mga mag-uuma bisan pa wala silay makuha nga salapi o bisan unsang ganti.