Sinulat ni Dave Albarado
Mihatag ug pasidunggog ang Sangguniang Panlalawigan (SP) niadtong Hunyo 29, 2021 atol sa regular nga sesyon ngadto kang kanhi Presidente Benigno Aquino III, ug sa duha ka mga kanhi mayor sa Bohol, matud sa taho.
Ang SP mipasar og resolusyon alang sa pagpasidungog sa namatay na nga si kanhi presidente Aquino ug sa kanhi mayor sa Panglao nga si Dodong Alcala ug kanhi mayor sa Tubigon nga si Luna Piezas.
Sa resolusyon nga gipasar en masse atol sa regular session sa SP nga gipangulohan ni Biss Gob. Rene Relampagos, gihatagan sa kagamhanang probinsiyal pinaagi sa usa ka pasidunggog ang kanhi presidente ug mga kanhi mayor.
Matud ni Relampagos nga dako ang tabang nga gihatag ni Aquino ngadto sa Bohol, ilabi ang panahon human gitay-og ang probinsya ug kusog nga linog niadtong tuig 2013.
Dugang sa bise gobernador nga sa panahon ni Aquino nagsugod ang pagtukod sa Bohol Panglao International Airport ug ang bag-ong kapitolyo sa kagamhanang probinsyal.
Si Aquino namatay niadtong Hunyo 24 , 2021 sa edad nga 61 gumikan sa renal failure secondary to diabetes.
Gawas kang Aquimo gihatagan sab ug pasidungog si Alcala ug Piezas kinsa namatay sab dili pa lang dugay.
Matud ni Relampagos nga gihatagan ug pasidunggog ang duha ka kanhi mayor gumikan sa kontribusyon ug mga nahimo sa ilang tagsa tagsang lungsod nga giserbisyohan.
Si Alcala namatay niadtong Hunyo 28, 2021 sa edad nga 73 samtang si Piezas namatay sa edad nga 77, niadtong Hunyo 29, 2021.