Ang Tawag 

ni Padre Jose joesum Sumampong, Jr.

Ang Ika-16 nga Domingo sa Tuig (A)

Hulyo 18, 2020

EBANGHELYO  Minubo (Mateo 13: 24-30)

²⁴Misugilon si Jesus ngadto sa katawhan og laing sambingay: “Ang Gingharian sa langit sama sa usa ka tawo nga nagpugas og maayong binhi didto sa iyang uma.  ²⁵Usa niana ka gabii, samtang nangatulog ang tanan, usa ka kaaway miadto ug misabod og liso sa mga sagbot sagol sa trigo, ug unya mibiya. ²⁶Sa nakatubo na ang mga tanom ug misugod na sa pagbuswak ang mga uhay, diha pa maiilhi ang mga sagbot. ²⁷Ang mga sulugoon sa tag-iya miduol kaniya ug miingon, “Sir, maayong binhi ang gipugas mo sa imong uma, busa diin man gikan ang mga sagbot?  ²⁸Siya mitubag, “Usa ka kaaway ang mihimo niini.  Sila nangutana kaniya,  “Gusto ka ba pangibton namo ang mga sagbot?”  ²⁹Siya mitubag, “Ayaw!  Kay sa inyo unyang pagpangibot sa mga sagbot, maapil unya pag-ibot ang mga trigo.  ³⁰Pasagdi ninyo nga ang mga trigo ug ang mga sagbot magdungag tubo hangtod sa ting-ani, kay ingnon ko ra unya ang mangangani: Ibta ninyo pag-una ang mga sagbot, bugkusa kini ug ilabay ngadto sa kalayo; apan tigoma ang trigo ug hiposa didto sa akong kamalig.”    Ang Ebanghelyo sa Ginoo.

oOo

KAHULOGAN SA EBANGHELYO  (Mateo 13: 24-30)

^24aGisugilon si Jesus ngadto sa katawhan og laing sambingay… 

Sa iyang pagka-hanas nga mosaysay og suginlanon, si Jesus migamit og maanindot nga larawan aron nga sayon ra nga masabtan ang iyang buot niyang itudlo ngadto sa iyang mga naminaw.  Bisan kon kausa lang kini isaysay, ang sambingay ni Jesus dili na hikalimtan.  Ang tuyo ni Jesus mao nga ang iyang suginlanon mahisulod dili lamang sulod sa kaalam kon dili sa kasingkasing sa mga nakadungog niini.

^24b“Ang Gingharian sa langit sama sa usa ka tawo nga nagpugas og maayong binhi didto sa iyang uma.  ²⁵Usa niana ka gabii, samtang nangatulog ang tanan, usa ka kaaway miadto ug misabod og liso sa mga sagbot sagol sa trigo, ug unya mibiya.

   Ang tanan nga mga tawo, kon siya mohimog pamalandong, makakat-on gayod sa suliran kabahin sa dautan. Walay usa kanato nga wala makasinati sa dautan—diha sa atong kaugalingong tawhanon nga pagpatuyang, sa mga kasakitan sa balatian, kasubo sulod sa kasingkasing o nga anaa sa konsensya, sa hilabihang ka lá sa sala, ang kalisod sa kahimtang sa kinabuhi, ang nagkabangi nga relasyon, ang mga salaod o krimen nga gibuhat batok sa katawhan, ang kamatayon!  Kinsay makatago gikan niini?

   Ang dakong kalainan sa duha ka magpupugas mao kini:  Ang maayong binhi gipugas panahon nga adunay kahayag; samtang ang mga sagbot gisabod panahon nga adunay kangitngit.

   Unsay may mga butang nga atong gihimo sa kahayag? Unsa man usab ang atong gihimo nga tinabunan sa kangitngit? 

²⁶Sa nakatubo na ang mga tanom ug misugod na sa pagbuswak ang mga uhay, diha pa mailhi ang mga sagbot. ²⁷Ang mga sulugoon sa tag-iya miduol kaniya ug miingon, “Sir, maayong binhi ang gipugas mo sa imong uma, busa diin man gikan ang mga sagbot?  ²⁸Siya mitubag, “Usa ka kaaway ang mihimo niini.  Sila nangutana kaniya,  “Gusto ka ba pangibton namo ang mga sagbot?”  ²⁹Siya mitubag, “Ayaw!  Kay sa inyo unyang pagpangibot sa mga sagbot, maapil unya pag-ibot ang mga trigo.  

   Makapalibog ang tubag ni Cristo. Sa miaging Domingo, sa saysay mahitungod sa “magpupugas”, si Jesus mipasidaan kanato mahitungod sa sagbot nga sampinit—kansang mga tunok motuok sa nagtubo nga trigo—nga maoy hinungdan sa pagkalawos ug pagkamatay sa nagtubo nga trigo.  Maoy hinungdan nga si Jesus misugyot nga “maminaw gayod kita” lawom pa kay sa unsay gipamulong. Ang kamatuoran gud mas labaw pa kay sa unsay pulong nga atong madungog. Sa matag pulong anaay nagpahipi nga kamatuoran ug kini kinahanglan nga paminawon.

^30aPasagdi ninyo nga ang mga trigo ug ang mga sagbot magdungag tubo hangtod sa ting-ani…

   Mao kini ang kabubut-on sa tag-iya sa umahan.  Ang Ginoo ra gayod ang makahukom sa katapusan.

   Sa laing bahin gitambagan kita sa dili paghukom, kay ang Ginoo nagbaton og mas taas ug malungtarong pasensya kay kanatong mga tawo. Siya midawat sa kamatuoran nga anaa gayod ang mga sagbot, ug pinaagi niini, Iyang gipadayag ang iyang kinutubang kalooy alang kanatong mga tawo bisan pa sa atong mga sayop.  Ang matag usa kanato nakadawat niining walay katapusang kalooy gikan sa Ginoo.  Ang dili ikalalis nga kamatuoran mao kini: sulod sa atong kasingkasing, hugot nga nagbaligtos ang maayo ug dautan. 

   Ang Dios mihimog dakong risgo nga diha sa matag tawo ang maayong tanom nga makahatag og kinabuhi ug ang sagbot nga dautan nga makapatay Iyang gitugotan sa dungan nga pagtubo.

   Ato na ba gayod nga nasabtan ngano nga sa GSK anaay mga aktibo—andam sa makanunayong pagngilabot niini; ug sa laing bahin adunay mga sakop niini nga wala gayod manumbaling?  Ato ba silang gisaway, gipanghimaraot o gani gisalikway—dili nato tugotan nga ang ilang mga anak bunyagan, o sila ipalubong o ipakasal, ubp. Inay nga kini maoy himoon, ato gayong pangitaan og dugang pang mga pamaagi nga ang mga katawhan nga ingon niini, maimbitahan og mga lakang nga makapadugang sa pagtuon kabahin sa atong pagtuo.

   Kita nga mga Kristyanos dili labaw sa mga maayong butang kay sa mga dili-kristyanos. Sa matag usa kanato, sa matag makasasala, ang Ginoo nagtanyag og kahigayonan nga siya madugangan diha sa pagtubo. Ang Ginoo naghatag og igong kutay aron ang kinahanglanon nga pag-usab o pagbag-o mahitabo sa hustong panahon.

   Unsaon ko kaha sa pagpahimutang niining maong sambingay sa akong kaugalingong kinabuhi?

^30bkay ingnon ko ra unya ang mangangani: Ibta ninyo pag-una ang mga sagbot, bugkusa kini ug ilabay ngadto sa kalayo; apan tigoma ang trigo ug hiposa didto sa akong kamalig.”   

   Ang panahon sa ani!  Usa kini ka larawan nga sabog mabasa diha sa Bibliya (Jeremias 51:33, Hosea 5:11, Joel 4:13). Tapos sa maayong pag-ani ang mga katawhan maghimog kasaulogan (Ruth 2; Isaias 9:2; Salmo 126:6).  Human sa makuting pagbudlay anaa ra gayod ang mga bunga, mga ani, mga abot!  Ang ani mao ang kapyestahan sa mga magbabaol.  Sa Bibliya ang pag-ani maoy larawan sa katapusang panahon (Isaias 28:27, 17:5; Amos 9:13).

   Kinahanglan nga akong mapalutaw gayod ang nagtagong kahulogan niining maong sambingay kay bulawanon ang ikatudlo niini sa akong personal nga pagpakabuhi!   Sumala sa gitudlo ni Jesus, ang tanang binuhat sa Dios anaa nagalawig padulong sa ilang mga katuyoan.  Nasayod ang Dios nga ang trigo dili mamatay, bisan pa kon sa atong kinaugalingong tawhanon nga paghunahuna anaa ang tumang kahadlok nga unya og kini mamatay. Dinhi gihagit kita sa pagrespeto bisan pa niadtong nakasala.