Sinulat ni John Paul Elicano
Malaumon si Chief implementer of the National Task Force (NTF) against Coronavirus disease (Covid) Sec. Carlito Galvez Jr. nga mahimong motaas ang vaccination rate sa nasud ning sunod nga mga bulan tungod sa mga umaabot nga mga bakuna, nga ihatag sugod niining bulan.
Matod ni Galvez kaniadtong Lunes, Hulyo 12, 2021, nakab-ot sa Pilipinas ang gidaghanon nga 13 milyon nga nabakunahan bisan pa man sa mga pagkalangan sa pagdeliver sa mga bakuna.
Matod usab sa kalihim sa Talk to People ni President Rodrigo Duterte, nga naglaum ang kagamhanan nga motaas na ang agi sa pagbakuna niining musunod nga mga semana ug bulan tungod sa gilauman nga moabot nga sobra sa 11 milyon ka mga bakuna sa buwan sa Hulyo.
Dugang pa niya, sobra sa 4 million ka mga doses sa Covid ang moabot sunod semana lakip niini ang 2.5 milyon doses sa Sinovac, 1.17 milyon doses sa AstraZeneca, ug 3,239,400 doses nga donation sharing gikan sa COVAX facility ug United States of America.
Karon umaabot nga Agosto 2021, ang Pilipinas naglaum nga makadawat ug kinatibuk-ang 16,570,000 doses nga mga bakuna: nga gilangkoban sa 8.4 million doses sa Sinovac, 1.17 million doses sa AstraZeneca, 2 million doses sa Pfizer, 1 million doses sa Moderna, ug 4 million doses nga gikan sa COVAX facility.
Sa pagkakaron, ang Pilipinas adunay kinatibuk-ang 20,779,910 ka mga doses sa tipiganan niini ug ang 9,180,310 niini, pulos donated vaccines.