Sinulat ni Dave Albarado
Ang mga kabataan nga nag-edad og 5 anyos pataas dinhi sa Bohol mahimo nang tugotang makagawas sa pinuy-anan ug makasuroy pinasikad sa direktiba sa nasodnong kagamhanan nga luagan ang restrictions sa mga kabataan sa mga lugar nga ubos sa modified general community quarantine (MGCQ) ug general community quarantine (GCQ) areas.
Matod sa mga taho ang bag-ong palisiya sa probinsiya gipatuman pinaagi sa Executive Order (EO) No. 35 nga gipirmahan ni Gob. Arthur Yap niadtong Lunes, Hulyo 12, 2021.
Ang bag-ong kamandoan nag-usab sa EO No. 54 series of 2020, nga naglatid nga ang mga kabataan nga nag-edad ug 5 anyos pataas tugotan nang makagawas basta nga sila dunay kauban nga hamtong ang pangidaron.
Subay sa national Inter Agency Task Force (IATF) Resolution No. 125, sila gitugotan nga makabisita sa mga parke, playgrounds, beaches, biking ug hiking trails, outdoor tourist sites ug mga susamang lugar matud sa gi-accredit sa Department of Tourism, ug mga kan-anan nga anaa sa gawas, ug mga sports courts nga diin gi dula ang mga gitawag nga non-contact mga paugnat sa kusog.
Ang mga kabataan, hinoon, moobserbar gihapon sa basic health protocols sama sa pagsul-ob ug face mask ug social distancing.
Apan ang mga indoor nga mga establisyemento sama sa mga malls, dili gihapon makasulod ang mga kabataan.